മലപ്പുറം : ബാങ്കിൽ നിന്ന് പണവുമായി ഇറങ്ങുകയായിരുന്ന യുവാവിൽനിന്ന് 9.95 ലക്ഷം രൂപ തട്ടിപ്പറിച്ചുകടന്ന സംഭവത്തിൽ വഴിത്തിരിവ്.പണം തട്ടിയെടുത്തത് പണത്തിന്റെ യഥാർഥ ഉടമകളാണെന്നാണ് പോലീസിന്റെ പ്രാഥമിക നിഗമനം.പണം കൈമാറ്റത്തിലെ ഏജന്റ് മാത്രമായിരുന്നു ഫിറോസ് എന്നും മൊത്തം പണവുമായി ഇയാൾ മുങ്ങിയേക്കുമെന്ന സംശയമാകാം അക്രമത്തിനു കാരണമായതെന്നും പോലീസ് കരുതുന്നു.
തിങ്കളാഴ്ച്ച രാവിലെ നിലമ്പൂർ ജില്ലാ ആശുപത്രി റോഡിലുള്ള ബാങ്ക് ഓഫ് ബറോഡയ്ക്ക് മുൻവശം വെച്ചാണ് സംഭവം.ബാങ്കിൽ നിന്നും പണം പിൻവലിച്ച് പുറത്തേക്കിറങ്ങുമ്പോൾ പുറത്തു കാത്തുനിന്ന കവർച്ചാസംഘം ഫിറോസിനെ ആക്രമിച്ച് പണവുമായി കടന്നുകളയുകയായിരുന്നു.അനധികൃത ഓൺലൈൻ വ്യാപാരത്തിലൂടെയോ മറ്റ് വഴികളിലൂടെയോ ലഭിക്കുന്ന പണം ബാങ്ക് ഇടപാടുകളിലൂടെ നിയമാനുസൃതമാക്കാനുള്ള ശ്രമമായിരുന്നോ എന്നും പോലീസ് പരിശോധിക്കുന്നുണ്ട്.
സംഭവവുമായി ബന്ധപ്പെട്ട് മുഹമ്മദ് ഷാഫി (23) എന്നയാളെ പോലീസ് അറസ്റ്റ് ചെയ്തു.സംഭവത്തിൽ പന്ത്രണ്ടോളം പേർക്ക് പങ്കുണ്ടെന്നാണ് സൂചന.





