പത്തനംതിട്ട: ജില്ലയിൽ കടുത്ത ചൂടും വേനൽ വറുതിയും കാരണം കാർഷിക മേഖല വൻ പ്രതിസന്ധിയിലേക്ക്. ആഴ്ചകളായി തുടരുന്ന കടുത്ത വെയിലും മഴയുടെ ലഭ്യതക്കുറവും മൂലം പ്രധാന വിളകളെല്ലാം കരിഞ്ഞുണങ്ങുന്ന അവസ്ഥയിലാണ്. ഇതിനു പുറമേ രാസവളങ്ങളുടെ വിലയിലുണ്ടായ വൻ വർധനവ് കൂടിയായതോടെ എന്തുചെയ്യണമെന്നറിയാത്ത അവസ്ഥയിലാണ് ജില്ലയിലെ കർഷകർ.
നെല്ല്, വാഴ, കുരുമുളക്, പച്ചക്കറികൾ തുടങ്ങിയ വൻകിട-ചെറുകിട കൃഷികളെല്ലാം വേനൽച്ചൂടിൽ കരിഞ്ഞു കൊണ്ടിരിക്കുകയാണ്. ജലസ്രോതസ്സുകൾ വറ്റിവരണ്ടതോടെ നനയ്ക്കാൻ പോലും വെള്ളമില്ലാത്ത സ്ഥിതി. മലയോര മേഖലകളിലും നാട്ടിൻപുറങ്ങളിലും ഒരുപോലെയാണ് കൃഷിനാശം സംഭവിച്ചു കൊണ്ടിരിക്കുന്നത്. ലക്ഷക്കണക്കിന് രൂപ കടമെടുത്തും ബാങ്ക് വായ്പയെടുത്തുമാണ് പലരും കൃഷിയിറക്കിയത്. വിളവെടുപ്പ് സീസൺ അടുത്തിരിക്കെ വിളകൾ നശിക്കുന്നത് കർഷകരുടെ പ്രതീക്ഷകളെ തകിടം മറിക്കുന്നു.
കൃഷിനാശത്തിന് പുറമേയാണ് രാസവളങ്ങൾക്കുണ്ടായ അമിത വിലവർധനവ്. പൊട്ടാഷ്, ഡി.എ.പി, കോംപ്ലക്സ് വളങ്ങൾ എന്നിവയ്ക്കൊട്ടാകെ ചാക്കിന് നൂറു മുതൽ അഞ്ഞൂറ് രൂപ വരെയാണ് സമീപദിവസങ്ങളിൽ വർധിച്ചത്. കീടനാശിനികളുടെ വിലയും കുത്തനെ ഉയർന്നു. ഉൽപ്പാദനച്ചെലവ് ഇരട്ടിയാകുമ്പോൾ അതിനനുസരിച്ചുള്ള വില കാർഷിക ഉൽപ്പന്നങ്ങൾക്ക് വിപണിയിൽ ലഭിക്കുന്നുമില്ല.
രൂക്ഷമായ വരൾച്ചയും വളത്തിന്റെ വിലവർധനവും കാരണം കൃഷി ഉപേക്ഷിക്കേണ്ട അവസ്ഥയിലാണ് സാധാരണക്കാരായ കർഷകർ. കൃഷിനാശം സംഭവിച്ചവർക്ക് അടിയന്തര സാമ്പത്തിക സഹായവും ഇൻഷുറൻസ് ആനുകൂല്യങ്ങളും ലഭ്യമാക്കണമെന്ന് കർഷക സംഘടനകൾ ആവശ്യപ്പെടുന്നു. അതോടൊപ്പം രാസവളങ്ങളുടെ വിലവർധനവ് പിൻവലിക്കാൻ സർക്കാരിന്റെ ഭാഗത്തുനിന്ന് അടിയന്തര ഇടപെടൽ ഉണ്ടാകണമെന്നാണ് കർഷകരുടെ ഒന്നടങ്കമുള്ള ആവശ്യം.
