തൃശ്ശൂർ : തൃശ്ശൂർ കയ്പമംഗലത്ത് യുവാവിനെ സംഘം ചേർന്ന് തട്ടിക്കൊണ്ടുപോയി തല്ലിക്കൊന്ന് ആംബുലൻസിൽ ഉപേക്ഷിച്ചു .കോയമ്പത്തൂർ സ്വദേശി അരുൺ (40) ആണ് കൊല്ലപ്പെട്ടത്.സംഭവത്തില് കണ്ണൂർ സ്വദേശിയായ ഐസ് ഫാക്ടറി ഉടമ സാദിഖിനെ പൊലീസ് തിരയുകയാണ്.
മൂന്ന് പേർക്കാണ് കൊലപാതകത്തിൽ പങ്കുള്ളതെന്ന് പൊലീസ് വ്യക്തമാക്കി.കാറിലെത്തിയ സംഘം അരുണിനെ മർദിച്ച് കൊന്ന ശേഷം വാഹന അപകടമാണെന്ന് പറഞ്ഞ് ആംബുലൻസ് വിളിച്ച് വരുത്തുകയായിരുന്നു.
സാദിക്കിന് 10 ലക്ഷം രൂപ അരുൺ നൽകാനുണ്ടായിരുന്നു. ഇത് തിരിച്ച് പിടിക്കാനായാണ് പാലിയേക്കര ടോൾ പ്ലാസയ്ക്ക് സമീപത്ത് നിന്ന് അരുണിനെയും സുഹൃത്ത് ശശാങ്കനെയും തട്ടിക്കൊണ്ടുപോയത്. ആളൊഴിഞ്ഞ എസ്റ്റേറ്റിലെത്തിച്ച് ബന്ധിയാക്കി ക്രൂരമായി മർദിക്കുകയും മർദനത്തിൽ അരുൺ കൊല്ലപ്പെടുകയുമായിരുന്നു.തുടർന്ന് മൃതദേഹം കയ്പമംഗലത്തെത്തിച്ച് പ്രതികൾ ആംബുലൻസ് വിളിച്ചുവരുത്തി. മൃതദേഹം കയറ്റി അയച്ചിട്ട് പുറകെ വരാമെന്നു പറഞ്ഞ് മുങ്ങുകയായിരുന്നു.അരുണിന്റെ സുഹൃത്ത് ശശാങ്കനെ മർദനമേറ്റ നിലയിൽ പിന്നീട് പൊലീസ് കണ്ടെത്തി.
