ന്യൂഡൽഹി : ജമ്മു കശ്മീരിലെ പൂഞ്ച് ജില്ലയില് പാകിസ്താന് നടത്തിയ ഷെല് ആക്രമണത്തില് സൈനികന് വീരമൃത്യു. ലാന്സ് നായിക് ദിനേശ് കുമാര് ആണ് ആക്രമണത്തില് കൊല്ലപ്പെട്ടത്. കൃഷ്ണ ഗടി സെക്ടറിലെ ലൈന് ഓണ് കണ്ട്രോളിലാണ് ഷെല് ആക്രമണം നടന്നത്. സംഭവത്തെ തുടർന്ന് പ്രദേശത്തെ നൂറിലധികം കുടുംബങ്ങളെ സുരക്ഷിതസ്ഥാനങ്ങളിലേക്ക് മാറ്റി പാർപ്പിച്ചു.
ഹരിയാനയിലെ പല്വാള് സ്വദേശിയാണ് ലാന്സ് നായിക് ദിനേശ് കുമാര്. ദിനേശ് കുമാറിന്റെ മൃതദേഹം സൈനിക ആശുപത്രിയില് സൂക്ഷിച്ചിരിക്കുകയാണ്. നാളെത്തന്നെ മൃതദേഹം നാട്ടിലെത്തിക്കാന് ശ്രമം നടത്തുമെന്ന് അധികൃതര് അറിയിച്ചു.
പഹല്ഗാം ആക്രമണത്തിന് ഓപ്പറേഷന് സിന്ദൂറിലൂടെ ഇന്ത്യ പാകിസ്താന് ശക്തമായ മറുപടി നല്കിയതിന് പിന്നാലെയാണ് സാധാരണജനങ്ങളെ ഉള്പ്പെടെ ലക്ഷ്യംവച്ച് പാകിസ്താന് ഷെല്ലാക്രമണം നടത്തിയത്.
