ശബരിമല : പമ്പാ സ്നാനഘട്ടില് അയ്യപ്പന്മാര് വസ്ത്രങ്ങള് ഉപേക്ഷിച്ച് പമ്പാനദി മലിനമാക്കുന്നത് തടയുന്നതിന് പത്തനംതിട്ട ജില്ലാ ശുചിത്വ മിഷന്റെ നേതൃത്വത്തില് ബോധവല്ക്കരണ ബാനര് സ്ഥാപിച്ചു. സ്നാനഘട്ടിന് എതിര്വശത്തായുള്ള ഗാബിയോണ് വാളിലാണ് 20 മീറ്റര് നീളവും മൂന്ന് മീറ്റര് വീതിയുമുള്ള ഐ.ഇ.സി ബാനര് സ്ഥാപിച്ചത്.
തീര്ത്ഥാടകര്ക്ക് എളുപ്പത്തില് കാണാന് കഴിയുന്ന വിധത്തില് വിവിധ ഭാഷകളില് ‘വസ്ത്രങ്ങള് ഉപേക്ഷിച്ച് പുണ്യനദിയായ പമ്പയെ മലിനമാക്കരുത്’ എന്ന ബോധവല്ക്കരണ സന്ദേശമാണ് ബാനറില് നല്കിയിരിക്കുന്നത്. ജില്ലാ ശുചിത്വമിഷന് കോര്ഡിനേറ്റര് കെ എം വിനീത്, അസിസ്റ്റന്റ് കോര്ഡിനേറ്റര് ജി പ്രദീപ് എന്നിവരുടെ നേതൃത്വത്തിലാണ് ബാനര് സ്ഥാപിച്ചത്.





