തൃശ്ശൂര് :ചാലക്കുടിയിലെ ബ്യൂട്ടി പാര്ലര് ഉടമ ഷീല സണ്ണിയെ വ്യാജ ലഹരി കേസില് കുടുക്കിയ മരുമകളുടെ സഹോദരി ലിവിയ ജോസ് പോലീസ് കസ്റ്റഡിയില്. സംഭവത്തിലെ മുഖ്യ ആസൂത്രകയാണ് ലിവിയ ജോസ്. ദുബായില് നിന്ന് മുംബൈയില് വിമാനമിറങ്ങിയപ്പോഴാണ് ഇവര് പിടിയിലായത് .ഇവരെ പിടികൂടാന് പോലീസ് ലുക്കൗട്ട് നോട്ടീസ് പുറത്തിറക്കിയിരുന്നു.
2023 മാർച്ച് 27നാണ് ഷീല സണ്ണിയുടെ സ്കൂട്ടറിൽനിന്ന് വ്യാജ എൽഎസ്ഡി സ്റ്റാമ്പുകൾ എക്സൈസ് പിടിച്ചെടുത്തത്.72 ദിവസം റിമാന്റിൽ കിടന്ന ഷീലയെ പിന്നീട് കുറ്റവിമുക്തയാക്കുകയായിരുന്നു .ഷീലയും മരുമകളുമായി പ്രശ്നങ്ങൾ ഉണ്ടായിരുന്നു . ഷീലയെ കുടുക്കാൻ മരുമകളുടെ സഹോദരി ലിവിയ സുഹൃത്തായ നാരായണദാസിനെ ഉപയോഗിച്ചുവെന്നാണ് പ്രോസിക്യൂഷൻ കേസ്. നാരായണദാസിനെ ബാംഗ്ലൂരിൽ നിന്ന് നേരത്തെ പിടികൂടിയിരുന്നു. പോലീസ് ചോദ്യം ചെയ്യാന് വിളിപ്പിച്ചപ്പോള് ലിവിയ ദുബായിലേക്ക് കടക്കുകയായിരുന്നു.
