ന്യൂഡല്ഹി: ഡല്ഹിയിലെ ചെങ്കോട്ടയ്ക്ക് സമീപത്തുണ്ടായ സ്ഫോടനത്തില് മരിച്ചവരുടെ കുടുംബങ്ങള്ക്ക് ധനസഹായം പ്രഖ്യാപിച്ച് സര്ക്കാര്. ഡല്ഹിയില് നടന്ന ദൗര്ഭാഗ്യകരമായ സംഭവം നഗരത്തെയാകെ ഞെട്ടിച്ചിരിക്കുകയാണെന്ന് ഡല്ഹി മുഖ്യമന്ത്രി രേഖ ഗുപ്ത എക്സില് കുറിച്ചു.
സ്ഫോടനത്തില് പ്രിയപ്പെട്ടവരെ നഷ്ടപ്പെട്ട കുടുംബങ്ങളെ മുഖ്യമന്ത്രി അഗാധമായ അനുശോചനം അറിയിച്ചു. ദുരിതബാധിതരായ ഓരോ കുടുംബത്തോടും ഡല്ഹി സര്ക്കാര് ഉറച്ചുനില്ക്കുമെന്നും രേഖ ഗുപ്ത പറഞ്ഞു. മരിച്ചവരുടെ കുടുംബങ്ങള്ക്ക് 10 ലക്ഷം രൂപ വീതവും, അംഗവൈകല്യം സംഭവിച്ചവര്ക്ക് 5 ലക്ഷം രൂപയും ഗുരുതരമായി പരിക്കേറ്റവര്ക്ക് 2 ലക്ഷം രൂപയും നഷ്ടപരിഹാരമായി നല്കും. പരിക്കേറ്റ എല്ലാവര്ക്കും സാധ്യമായ ചികിത്സ സര്ക്കാര് ഉറപ്പാക്കുമെന്നും അവര് കൂട്ടിച്ചേര്ത്തു.
രാജ്യത്തെ നടുക്കിയ ഡല്ഹി ചെങ്കോട്ട സ്ഫോടനക്കേസ് എന്ഐഎ അന്വേഷിക്കും. കേസ് ആഭ്യന്തര മന്ത്രാലയം ദേശീയ അന്വേഷണ ഏജന്സിക്ക് കൈമാറി. അന്വേഷണത്തിന്റെ ഭാഗമായി അടുത്ത മൂന്ന് ദിവസത്തേക്ക് ചെങ്കോട്ടയില് സന്ദര്ശകര്ക്ക് പ്രവേശനം അനുവദിക്കില്ല. ലാല് കില മെട്രോ സ്റ്റേഷന്റെ വയലറ്റ് ലൈനും സുരക്ഷാ കാരണങ്ങളാല് ഡിഎംആര്സി അടച്ചിട്ടുണ്ട്. 13 പേരാണ് സ്ഫോടനത്തില് മരിച്ചത്. ഇവരില് ഏഴുപേരെ തിരിച്ചറിഞ്ഞിട്ടുണ്ട്. 20ലേറെ പേര് പരുക്കേറ്റ് ചികില്സയിലാണ്.
