തിരുവല്ല: മലയാറ്റൂർ തീർത്ഥാടനം കഴിഞ്ഞ് മടങ്ങിയ സംഘം സഞ്ചരിച്ചിരുന്ന കാർ നിയന്ത്രണം നഷ്ടപ്പെട്ട് റോഡ് വശത്തെ പുരയിടത്തിലേക്ക് തല കീഴായി മറിഞ്ഞു. മൂന്ന് പേർക്ക് പരിക്ക്. ആരുടെയും പരിക്ക് ഗുരുതരമല്ല. എംസി റോഡിൽ കുറ്റൂരിന് സമീപം ഇന്ന് പുലർച്ചെ നാലുമണിയോടെയായിരുന്നു അപകടം. കൊല്ലം കണ്ണമല സ്വദേശികളായ ബിജു ജോസഫ് ( 59), ആഷിക് ബിജി (19), റീത്ത (76) എന്നിവർക്കാണ് പരിക്കേറ്റത്.
തിരുവല്ല ഭാഗത്ത് നിന്നും ചെങ്ങന്നൂർ ഭാഗത്തേക്ക് പോവുകയായിരുന്ന കാറിനെ പിന്നാലെ എത്തിയ ടിപ്പർ മറികടക്കാൻ ശ്രമിക്കുന്നതിനിടെ നിയന്ത്രണം നഷ്ടപ്പെടുക ആയിരുന്നു. നിയന്ത്രണം നഷ്ടപ്പെട്ട കാർ റോഡ് വക്കിലെ വൈദ്യുത പോസ്റ്റുകളിലും കോൺക്രീറ്റ് തൂണുകളിലും ഇടിച്ച ശേഷം സമീപത്തെ പുരയിടത്തിൽ തലകീഴായി മറിയുകയായിരുന്നു. പരിക്കേറ്റവരെ നാട്ടുകാരും പോലീസും ചേർന്ന് തിരുവല്ലയിലെ സ്വകാര്യ ആശുപത്രിയിൽ പ്രവേശിപ്പിച്ചു.
