തിരുവനന്തപുരം : തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിന്റെ പ്രധാന ഘട്ടമായ നാമനിർദേശ പത്രിക സമർപ്പണം ഇന്ന് ആരംഭിച്ചു. രാവിലെ 11 മുതൽ വൈകീട്ട് 3 വരെ പത്രിക സമർപ്പിക്കാം. ഞായറാഴ്ച ഒഴികെ ഏഴ് ദിവസത്തേക്ക് പത്രിക നൽകാം. ഈ മാസം 21 നാണ് പത്രിക സമർപ്പണത്തിന്റെ അവസാന ദിവസം, അന്നും വൈകീട്ട് 3 വരെ പത്രിക നൽകാവുന്നതാണ്.
നാമനിർദേശപത്രികകളുടെ സൂക്ഷ്മപരിശോധന 22-ാം തീയതിയും, പത്രിക പിൻവലിക്കാനുള്ള അവസാന തീയതി 24-നും ആയിരിക്കും. 2020 ലെ തിരഞ്ഞെടുപ്പിൽ 1,16,969 പേർ പത്രിക നൽകിയതിൽ 74,835 സ്ഥാനാർത്ഥികൾ മാത്രമായിരുന്നു മത്സരരംഗത്തുണ്ടായിരുന്നത്. സംസ്ഥാനത്ത് തിരഞ്ഞെടുപ്പ് രണ്ട് ഘട്ടങ്ങളിലായാണ് നടക്കുക.
ഡിസംബർ 9-ന് തിരുവനന്തപുരം, കൊല്ലം, പത്തനംതിട്ട, കോട്ടയം, ആലപ്പുഴ, ഇടുക്കി, എറണാകുളം. 11-ന് തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ്. 13-ന് വോട്ടെണ്ണൽ നടക്കും. ആകെ 1200 തദ്ദേശ സ്ഥാപനങ്ങളിൽ 1199 സ്ഥാപനങ്ങളിലേക്കാണ് തിരഞ്ഞെടുപ്പ് നടക്കുന്നത്.
മട്ടന്നൂരിൽ തിരഞ്ഞെടുപ്പ് പിന്നീട് നടത്തും. സംസ്ഥാനത്ത് 33,746 പോളിംഗ് സ്റ്റേഷനുകളും, 23,576 വാർഡുകളും ഉണ്ട്. ആകെ വോട്ടർമാർ 2,84,30,761 പേരാണ്. ഇതിൽ 2,841 പ്രവാസി വോട്ടർമാരും ഉൾപ്പെടുന്നു
