കോഴഞ്ചേരി: ആറൻമുള പള്ളിയോടങ്ങളിൽ അമ്പത്തിമൂന്നാമത്തേതായ മുക്കന്നൂർ പള്ളിയോടത്തിനായി നിർമ്മാണ സമിതി രൂപീകരിച്ച് പ്രവർത്തനം ആരംഭിച്ചു. പള്ളിയോടം നിർമ്മിക്കുന്നതിനായി ആറൻമുള പള്ളിയോട സേവാ സംഘം മുക്കന്നൂർ 720 നമ്പർ ശ്രീശങ്കരവിലാസം എൻ എസ് എസ് കരയോഗത്തിന് അനുമതി നൽകിയിരുന്നു.
മുക്കന്നൂർ മഹാദേവ ക്ഷേത്രത്തിൽ നടന്ന നിർമ്മാണ സമിതി രൂപീകരണ യോഗം ആറൻമുള പള്ളിയോട സേവാ സംഘം ജോയിൻ്റ് സെക്രട്ടറി അജയ് ഗോപിനാഥ് ഉദ്ഘാടനം ചെയ്തു. മഹാദേവ ക്ഷേത്രം ട്രസ്റ്റ് പ്രസിഡണ്ട് എ പി വിജയകുമാർ അദ്ധ്യക്ഷത വഹിച്ചു. അയിരൂർ ഗ്രാമ പഞ്ചായത്ത് അംഗം സ്മിത സോമശേഖരൻ,
ശ്രീരാജ് തടത്തിൽ. പി ജി സജികുമാർ, വിഷ്ണു വി നായർ എന്നിവർ പ്രസംഗിച്ചു.
പള്ളിയോട നിർമ്മാണ സമിതി ഭാരവാഹികളായി വി കെ വിനുകുമാർ വലിയവീട്ടിൽ (പ്രസിഡണ്ട്), ശ്രീരാജ് തടത്തിൽ (വൈസ് പ്രസിഡണ്ട്), വിഷ്ണു വി നായർ (സെക്രട്ടറി), പി പ്രശാന്ത് ലാൽ (ജോയിൻ്റ് സെക്രട്ടറി) പി . ജി .സജി കുമാർ (ട്രഷറാർ) എ പി .വിജയകുമാർ നായർ ( ജനറൽ കൺവീനർ) വി. എസ്.ഹൃഷികേശ് കുമാർ (ഫിനാൻസ് കൺവീനർ) പ്രസാദ് മൂക്കന്നൂർ, സി. ആർ രഘുനാഥൻ നായർ (പബ്ളിസിറ്റി കൺവീനർമാർ) എന്നിവരടങ്ങുന്ന 25 അംഗ സമിതി രൂപീകരിച്ചു. ബി ബാച്ച് പുതിയ പള്ളിയോടമാണ് മൂക്കന്നൂരിൽ നിർമ്മിക്കുന്നത് .
65 ലക്ഷത്തിൽപ്പരം രുപയാണ് നിർമ്മാണ ചിലവായി പ്രതീക്ഷിക്കുന്നത്. തിരുവോണത്തോണി ചിങ്ങത്തിലെ ഉത്രാടം നാൾ വൈകിട്ട് കാട്ടൂരിൽ നിന്നും പുറപ്പെടുന്നതിന് മുൻപായി തോണിയെ കുളിപ്പിക്കുന്ന ചടങ്ങ് നടക്കുന്ന മൂക്കന്നൂരിൽ പള്ളിയോടം വേണമെന്ന നാട്ടുകാരുടെ ഏറെക്കാലത്തെ ആഗ്രഹമാണ് സഫലമാകുന്നത്.
ചിങ്ങമാസത്തിൽ നിർമ്മാണം ആരംഭിച്ച് അടുത്ത വർഷത്തെ ആറൻമുള ഉതൃട്ടാതി വള്ളം കളിക്ക് മുമ്പായി പള്ളിയോടം നീരണിയിക്കുന്നതിനാണ് ലക്ഷ്യമെന്ന് പബ്ളിസിറ്റി കൺവീനർ പ്രസാദ് മൂക്കന്നൂർ അറിയിച്ചു.
