പത്തനംതിട്ട : ഡ്യൂട്ടി സമയത്ത് മദ്യപിച്ചെന്ന ഗുരുതര ആരോപണത്തെ തുടർന്ന് കൊടുമൺ പോലീസ് സ്റ്റേഷനിലെ നാല് ഉദ്യോഗസ്ഥരെ വൈദ്യപരിശോധനയ്ക്ക് വിധേയമാക്കി. പരിശോധനയിൽ ഇവരിൽ രണ്ട് ഉദ്യോഗസ്ഥരിൽ മദ്യത്തിന്റെ ഗന്ധം കണ്ടെത്തിയതായാണ് പ്രാഥമിക വിവരം. സംഭവത്തെ തുടർന്ന് പോലീസ് സേനയ്ക്കുള്ളിൽ വലിയ ചർച്ചയും വിവാദവും ഉടലെടുത്തിട്ടുണ്ട്.
പോലീസ് വാഹനം അസ്വാഭാവികമായ രീതിയിൽ സഞ്ചരിക്കുന്നത് ശ്രദ്ധയിൽപ്പെട്ടതോടെയാണ് ഉദ്യോഗസ്ഥർക്കെതിരെ പരാതി ഉയർന്നത്. ഡ്യൂട്ടിയിലുണ്ടായിരുന്ന ഉദ്യോഗസ്ഥർ മദ്യം വാങ്ങി സ്റ്റേഷനിലേക്ക് വരുന്നതു കണ്ടെന്ന വിവരവും പുറത്തുവന്നിട്ടുണ്ട്. സ്റ്റേഷന്റെ മുഖ്യ ചുമതലയുള്ള പോലീസുകാരൻ അടക്കമുള്ളവർ മദ്യപിച്ചെന്നാണ് പ്രധാന ആരോപണം.
സംഭവമറിഞ്ഞ് രാത്രിയോടെ ഡിവൈഎഫ്ഐ പ്രവർത്തകർ കൊടുമൺ പോലീസ് സ്റ്റേഷനിൽ എത്തി പ്രതിഷേധം രേഖപ്പെടുത്തി. ഉദ്യോഗസ്ഥരുടെ ഔദ്യോഗിക രക്തപരിശോധനാ ഫലം പുറത്തുവരുന്നതോടെ സംഭവത്തിൽ കൂടുതൽ വ്യക്തത ലഭിക്കുമെന്നാണ് പ്രതീക്ഷിക്കുന്നത്.
