കൊച്ചി : വയനാട് സ്വദേശി വിവാഹം ചെയ്ത പാക് പൗരയായ ഭാര്യയ്ക്ക് വിസ വേണമെന്ന ഹർജി തള്ളി ഹൈക്കോടതി.ഇന്ത്യക്കാരനെ വിവാഹം കഴിച്ചതുകൊണ്ട് മാത്രം വിസയോ രാജ്യത്തേക്ക് പ്രവേശനമോ അനുവദിക്കാാനികില്ലെന്ന് ഹൈക്കോടതി വ്യക്തമാക്കി .
ദുബായിൽ വച്ച് വിവാഹിതരായ യുവാവും പാകിസ്ഥാനി യുവതിയും വിദേശത്താണ് താമസിക്കുന്നത്.സഹോദരന്റെ വിവാഹത്തിൽ പങ്കെടുക്കുന്നതിനായി ഭാര്യയ്ക്ക് ഇന്ത്യൻ വിസയ്ക്ക് അപേക്ഷിക്കാനുള്ള സൗകര്യം പോലും ഓൺലൈൻ പോർട്ടലിൽ ലഭ്യമല്ലെന്നും ചൂണ്ടിക്കാട്ടിയാണ് ഹൈക്കോടതിയെ സമീപിച്ചത്.
പഹൽഗാം ഭീകരാക്രമണത്തെ തുടർന്ന് 2025 ഏപ്രിൽ 25 മുതൽ പാക്കിസ്ഥാൻ പൗരന്മാർക്കുള്ള വിസ സേവനങ്ങൾ നിർത്തിവച്ചിരിക്കുകയാണെന്ന് കേന്ദ്രസർക്കാർ കോടതിയെ അറിയിച്ചു.1946ലെ ഫോറിനേഴ്സ് ആക്ടിലെ സെക്ഷൻ 3 പ്രകാരമാണ് വിസ സേവനങ്ങൾ നിർത്തിവെക്കാൻ കേന്ദ്രം ഉത്തരവിട്ടത്.
രാജ്യസുരക്ഷയും വിദേശനയവും കണക്കിലെടുത്ത് വിദേശ പൗരന്മാരുടെ ഇന്ത്യയിലേക്കുള്ള പ്രവേശനം, രാജ്യത്തെ താമസം, സഞ്ചാരം, മടക്കയാത്ര എന്നിവ നിയന്ത്രിക്കുന്നത് കേന്ദ്രസർക്കാരിന്റെ പ്രത്യേക അധികാരമാണെന്ന് ഹൈക്കോടതി വ്യക്തമാക്കി.
