ചങ്ങനാശേരി : മൂവാറ്റുപുഴയിൽ നിന്നു ചങ്ങനാശേരിയിലേക്ക് കെഎസ്ആർടിസി ഫാസ്റ്റ് പാസഞ്ചർ സർവീസ് ആരംഭിക്കണമെന്നാവശ്യപ്പെട്ട് മാത്യു കുഴൽനാടൻ എംഎൽഎ കെഎസ്ആർടിസിക്ക് നൽകിയ കത്ത് ചങ്ങനാശേരിക്ക് പ്രതീക്ഷയേകുന്നു.
എംസി റോഡിനു സമാന്തരമായി കൂത്താട്ടുകുളം – ഉഴവൂർ – മണർകാട് – പുതുപ്പള്ളി – തെങ്ങണ വഴി സർവീസ് നടത്തണമെന്നാണ് നിർദേശം. കോട്ടയം, എറണാകുളം ജില്ലകളെ ബന്ധിപ്പിക്കുന്ന സർവീസ് മികച്ച വരുമാനം നൽകുമെന്നാണ് വിലയിരുത്തൽ. ഈ സർവീസ് ആരംഭിക്കണമെന്ന് ജനകീയ ആവശ്യം ഉയർന്നിരുന്നു. ചങ്ങനാശേരി സ്വദേശിയും കൊച്ചി ഇടപ്പള്ളിയിൽ താമസക്കാരനുമായ രമേശ് മാത്യുവിന്റെ നിർദേശത്തിന്റെ അടിസ്ഥാനത്തിലാണ് എംഎൽഎയുടെ ഇടപെടൽ.
കോട്ടയം, ഏറ്റുമാനൂർ നഗരങ്ങളിലെ തിരക്ക് ഒഴിവാക്കി യാത്ര ചെയ്യാം.
നെടുമ്പാശേരിയിലേക്കുള്ള യാത്രക്കാർക്ക് സർവീസ് ഏറെ പ്രയോജനപ്പെടും. കോട്ടയം, എറണാകുളം ജില്ലകളിലെ 12 പഞ്ചായത്തുകളിലൂടെ സർവീസ് കടന്നു പോകും. ചങ്ങനാശേരി പാറേൽ മരിയൻ തീർഥാടന കേന്ദ്രം, പുതുപ്പള്ളി പള്ളി, മണർകാട് കത്തീഡ്രൽ, ഉഴവൂർ പള്ളി, പുതുപ്പള്ളി പള്ളി തീർഥാടന കേന്ദ്രങ്ങൾ ഈ പാതയിലാണ് തുടങ്ങി നിരവധി കാര്യങ്ങൾ കത്തിൽ സൂചിപ്പിച്ചത്.
