ശബരിമല: മകരവിളക്ക് ഉത്സവത്തിന് മുന്നോടിയായി അയ്യപ്പൻറെ പൂങ്കാവനം മാലിന്യമുക്തമാക്കുന്നതിനായി ജില്ലാ ഭരണകൂടവും ശബരിമല സാനിറ്റേഷൻ സൊസൈറ്റിയും സംയുക്തമായി പൂങ്കാവനം ശുചീകരണ യജ്ഞം സംഘടിപ്പിച്ചു. സന്നിധാനം, പമ്പ, നിലയ്ക്കൽ എന്നിവിടങ്ങളിൽ പൂങ്കാവനം ശുചീകരണ യജ്ഞം സംഘടിപ്പിച്ചത്. പമ്പയിൽ നടന്ന ശുചീകരണ പ്രവർത്തനത്തിന് ജില്ലാ കലക്ടർ എസ് പ്രേംകൃഷ്ണൻ, ശബരിമല എഡിഎം ഡോ. അരുൺ എസ് നായർ, അടൂർ ആർഡിഒ ബി. രാധാകൃഷ്ണൻ, ഡെപ്യൂട്ടി കലക്ടർ ആർ. രാജലക്ഷ്മി തുടങ്ങിയവർ നേതൃത്വം നൽകി.
പമ്പാനദി, പടവുകൾ, സ്നാനഘട്ടങ്ങൾ, തീർത്ഥാടനപാത തുടങ്ങിയവ വൃത്തിയാക്കി. ജില്ലയിലെ വിവിധ വകുപ്പ് ഉദ്യോഗസ്ഥർ, വിശുദ്ധി സേനാംഗങ്ങൾ, സിവിൽ ഡിഫൻസ്, മുസലിയാർ കോളേജിലെ വോളൻ്റിയേഴ്‌സ്, എൻഎസ്എസ് വോളൻ്റിയേഴ്‌സ്, സന്നദ്ധ സേവാസംഘടനാ പ്രതിനിധികൾ തുടങ്ങിയവർ പങ്കെടുത്തു.
