ആലപ്പുഴ: പുഞ്ച കൃഷിയുടെ കൊയ്ത്തു നടന്നുകൊണ്ടിരിക്കുന്ന പാടങ്ങളിലെ നെല്ല് സംഭരണം സമയബന്ധിതമായി പൂർത്തിയാക്കണമെന്ന് ജില്ലാ കളക്ടർ കെ. ഇമ്പശേഖർ ഉദ്യോഗസ്ഥർക്ക് നിർദ്ദേശം നൽകി. നെല്ല് സംഭരണത്തിൽ നിലവിലുള്ള പ്രശ്നങ്ങൾ അവലോകനം ചെയ്യുന്നതിനായി കളക്ടറുടെ ചേമ്പറിൽ ചേർന്ന ബന്ധപ്പെട്ട കൃഷി ഉദ്യോഗസ്ഥരുടെ യോഗത്തിൽ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം.
നെല്ലിന്റെ ഗുണനിലവാര പരിശോധന കൃത്യമായി നടത്തി അതിന്റെ അടിസ്ഥാനത്തിൽ സംഭരണ പ്രവർത്തനങ്ങൾ നടപ്പിലാക്കാൻ കളക്ടർ നിർദ്ദേശിച്ചു. സംഭരണവുമായി ബന്ധപ്പെട്ടുണ്ടാകുന്ന പ്രശ്നങ്ങൾ യഥാസമയം പരിഹരിച്ച് നടപടികൾ പൂർത്തിയാക്കണമെന്നും അദ്ദേഹം പറഞ്ഞു.
