ന്യൂഡൽഹി : ഐ.എസ്.ആർ.ഒയെ സ്വകാര്യവത്കരിക്കുമെന്ന പ്രചാരണങ്ങൾ തള്ളി ഏജൻസി.സ്വകാര്യവത്കരണം എന്ന പ്രചാരണം പൂർണമായി അടിസ്ഥാനരഹിതമാണെന്ന് ഐഎസ്ആർഒ പ്രസ്താവനയിലൂടെ പറഞ്ഞു. ഐഎസ്ആർഒ സ്വകാര്യവത്കരിക്കുകയോ അതിന്റെ പ്രാധാന്യം കുറയ്ക്കുകയോ ചെയ്യില്ല.
ബഹിരാകാശ മേഖലയിലെ സ്വകാര്യപങ്കാളിത്തം ഐഎസ്ആർഒയുടെ പ്രാധാന്യം കുറയ്ക്കില്ല. മറിച്ച് ഇന്ത്യൻ ബഹിരാകാശ പദ്ധതിയുടെ അടുത്തഘട്ടത്തിലേക്ക് കൂടുതൽ ശ്രദ്ധ കേന്ദ്രീകരിക്കാൻ ഐഎസ്ആർഒയെ സഹായിക്കുകയാണ് ചെയ്യുക.ബഹിരാകാശ ഗവേഷണം, സാങ്കേതികവിദ്യയുടെ വികസനം, തന്ത്രപരമായ ദൗത്യങ്ങൾ തുടങ്ങിയവയ്ക്കായുള്ള സുപ്രധാന സ്ഥാപനമായി ഐഎസ്ആർഒ തുടരുമെന്ന് പ്രസ്താവനയിൽ പറയുന്നു .
കഴിഞ്ഞദിവസങ്ങളിലാണ് ഐഎസ്ആർഒ സ്വകാര്യവത്കരിക്കുന്നു എന്ന വാർത്ത പുറത്തുവന്നത്. ഇതിന് പിന്നാലെയാണ് ഏജൻസിയുടെ വിശദീകരണം.
