പത്തനംതിട്ട : ശബരിമല മണ്ഡലകാല തീർത്ഥാടനത്തിന് വിപുലമായ ബസ് ക്രമീകരണങ്ങളുമായി കെഎസ്ആർടിസി. പമ്പയിലേക്കുള്ള തീർത്ഥാടകരുടെ യാത്രാസൗകര്യം ഉറപ്പാക്കാൻ കെഎസ്ആർടിസിയുടെ 439 ബസുകൾ വിവിധ ഡിപ്പോകളിൽനിന്ന് പിൻവലിച്ച് ശബരിമല സ്പെഷ്യൽ സർവീസുകൾക്കായി വിന്യസിക്കും. എന്നാൽ വെറ്റ് ലീസ് വ്യവസ്ഥയിൽ സ്വകാര്യ ബസുകൾ ലഭ്യമാക്കാനുള്ള പദ്ധതി പ്രതീക്ഷിച്ച രീതിയിൽ വിജയിക്കാത്തത് കോർപ്പറേഷന് തിരിച്ചടിയായി.
വെറ്റ് ലീസ് സംവിധാനത്തിലൂടെ 18 ബസുകൾ മാത്രമാണ് ഇതുവരെ ലഭിച്ചത്. സ്വകാര്യ ബസുകൾ കൂടുതലായി എത്തിച്ച് സ്ഥിരം സർവീസുകളെ ബാധിക്കാതെ ശബരിമല തീർത്ഥാടനത്തിന് ആവശ്യമായ വാഹനങ്ങൾ കണ്ടെത്താനായിരുന്നു കെഎസ്ആർടിസിയുടെ നീക്കം. എന്നാൽ ആവശ്യത്തിന് സ്വകാര്യ ബസുകൾ ലഭിക്കാത്ത സാഹചര്യത്തിൽ നിലവിൽ സർവീസ് നടത്തുന്ന ബസുകൾ തന്നെ പിൻവലിക്കേണ്ടിവരികയാണ്.
ഇതോടെ സംസ്ഥാനത്തിന്റെ വിവിധ ഭാഗങ്ങളിലെ പതിവ് സർവീസുകൾ താളംതെറ്റാനുള്ള സാധ്യതയും ശക്തമായി. പ്രത്യേകിച്ച് ദീർഘദൂര റൂട്ടുകളിലും യാത്രക്കാർ കൂടുതലുള്ള സർവീസുകളിലും ബസുകളുടെ കുറവ് യാത്രാക്ലേശത്തിന് ഇടയാക്കുമെന്ന ആശങ്കയുണ്ട്. പ്രിയദർശിനി ബസുകളും ശബരിമല സർവീസിനായി ഉപയോഗിക്കേണ്ടിവരും.
മണ്ഡലകാലത്തിന് മുമ്പായി 300 പുതിയ ബസുകൾ വാങ്ങാനുള്ള പദ്ധതി പ്രഖ്യാപിച്ചിരുന്നെങ്കിലും സമയബന്ധിതമായി നടപ്പാക്കാൻ കെഎസ്ആർടിസിക്ക് കഴിഞ്ഞില്ല. പുതിയ ബസുകൾ എത്തുമെന്ന് പ്രതീക്ഷിച്ചിരുന്നെങ്കിലും പദ്ധതി യാഥാർഥ്യമാകാത്തത് ശബരിമല സർവീസുകൾക്കുള്ള വാഹനലഭ്യതയെ ബാധിച്ചു.
ഓരോ വർഷവും ലക്ഷക്കണക്കിന് തീർത്ഥാടകരെത്തുന്ന ശബരിമലയിൽ നിലയ്ക്കൽ–പമ്പ ചെയിൻ സർവീസിനും വിവിധ ഡിപ്പോകളിൽനിന്നുള്ള പ്രത്യേക സർവീസുകൾക്കും ആവശ്യത്തിന് ബസുകൾ ഉറപ്പാക്കേണ്ടതുണ്ട്. ഇതിനായി ബസുകൾ ക്രമീകരിക്കുമ്പോൾ സംസ്ഥാനത്തെ മറ്റു മേഖലകളിലെ യാത്രക്കാരുടെ ബുദ്ധിമുട്ടും പരിഗണിക്കേണ്ട സാഹചര്യമാണുള്ളത്.
