തിരുവല്ല : ബാംഗ്ലൂരിൽ നിന്നും അടൂരിലേക്ക് പോവുകയായിരുന്ന ഇതര സംസ്ഥാന സർവീസ് ബസ്സിൽ കടത്തുകയായിരുന്ന എം.ഡി.എം.എയുമായി അടൂർ സ്വദേശികളായ രണ്ട് പേർ തിരുവല്ലയിൽ പോലീസിന്റെ പിടിയിലായി. 15 ഗ്രാമോളം തൂക്കം വരുന്ന എംഡി എം എ പിടിച്ചെടുത്തു. ബാംഗ്ലൂർ മഡുവാളയിൽ നിന്നും ഇന്നലെ വൈകിട്ട് 9മണിയോടെ പുറപ്പെട്ട യാത്ര എന്ന ടൂറിസ്റ്റ് ബസ്സിൽ സഞ്ചരിച്ചിരുന്ന അടൂർ പഴകുളം വലിയവിളയിൽ ഫൈസൽ മുഹമ്മദ് ( 24 ), അടൂർ പറക്കോട് അണ്ടൂർ തേക്കേതിൽ റോക്കി റോയി ( 21 ) ആണ് 15 ഗ്രാമോളം തൂക്കം വരുന്ന എംഡി എം എയുമായി പിടിയിലായത്.
തിരുവല്ല – ചെങ്ങന്നൂർ റോഡിൽ മഴുവങ്ങാട്ചിറയ്ക്ക് സമീപം പുളിമൂട്ടിൽ സിൽക്സിന് മുമ്പിലായി ചൊവ്വാഴ്ച രാവിലെ 9 മണിയോടെ ജില്ലാ പോലീസ് മേധാവിയുടെ കീഴിലുള്ള ഡാൻസാഫ് സംഘവും തിരുവല്ല പോലീസും ചേർന്ന് നടത്തിയ പരിശോധനയിൽ ആണ് ബസ്സിന്റെ ലഗേജ് കമ്പാർട്ട്മെൻറ് ഷൂസിലും ബാഗിനുള്ളിൽ സൂക്ഷിച്ചിരുന്ന പാന്റിന്റെ പോക്കറ്റിലും ഒളിപ്പിച്ച നിലയിലാണ് എം ഡി എം എ പിടികൂടിയത്.
പിടിയിലായ ഫൈസൽ മുഹമ്മദിന് എതിരെ എംഡി എം എ , കഞ്ചാവ് കടത്ത് അടക്കമുള്ള ഒട്ടനവധി കേസുകൾ നിലവിലുണ്ടെന്ന് പോലീസ് പറഞ്ഞു. ഇരുവരുടെയും കൈവശമുണ്ടായിരുന്ന മൊബൈൽ ഫോണുകളും പോലീസ് പിടിച്ചെടുത്തിട്ടുണ്ട്. വിശദമായ ചോദ്യം ചെയ്യലിന് ശേഷമേ പിടിയിലായ റോക്കി റോയിയെ പ്രതി ചേർക്കുകയുള്ളൂ എന്ന് പോലീസ് അറിയിച്ചു.
