തിരുവനന്തപുരം : മിഠായി രൂപത്തിലുള്ള ലഹരിയടങ്ങിയ പാഴ്സലുമായി മൂന്ന് തമിഴ്നാട് സ്വദേശികൾ അറസ്റ്റിൽ. പ്രശാന്ത്, ഗണേഷ് , മാർഗ്ഗ എന്നിവരാണ് പിടിയിലായത്. തിരുവനന്തപുരം റൂറൽ എസ്പിക്ക് കിട്ടിയ രഹസ്യ വിവരത്തെ തുടർന്ന് ഡാൻസാഫ് സംഘം നടത്തിയ പരിശോധനയിലാണ് ഇന്നലെ രാത്രിയിൽ ഇവർ പിടിയിലായത്.
വട്ടപ്പാറയിൽ ഒരു സ്വകാര്യ ബോയ്സ് ഹോസ്റ്റലിന്റെ വിലാസത്തിലാണ് പാഴ്സൽ എത്തിയത്. ഇത് വാങ്ങിയ 3 പേരെയാണ് നെടുമങ്ങാട് പോലീസ് പിടികൂടിയത്. ബോയ്സ് ഹോസ്റ്റലിന് സമീപത്തുള്ള വാടകവീട്ടിലാണ് ടൈൽ പണിക്കാരായ ഇവർ താമസിക്കുന്നത്. 105 മിഠായികളാണ് പാഴ്സൽ കവറിലുണ്ടായിരുന്നത്. കറുത്ത കളറിലുള്ള ഈ മിഠായിയിൽ ടെട്രാഹൈഡ്രോ കനാബിനോള് എന്ന ലഹരി വസ്തു ഉണ്ടെന്ന് പോലീസ് പറയുന്നു.സ്കൂൾ, കോളേജ്, ട്യൂഷൻ സെന്ററുകൾ കേന്ദ്രീകരിച്ച് പോലീസ് അന്വേഷണം ശക്തമാക്കിയിട്ടുണ്ട്.
