അടൂർ : പന്തൽ പണിക്ക് ഉപയോഗിക്കുന്ന സാധനങ്ങൾ മോഷ്ടിച്ച കേസിൽ 39കാരനായ ഒരാൾ പിടിയിൽ. ഏഴാം കുളം തൊടുവക്കാട് പാറച്ചരുവിൽ വീട്ടിൽ നിയാസ് ആണ് പിടിയിലായത്. ഏഴാംകുളം നെടുമൺ കക്കാട് കുളിയിൽ ഷാജഹാൻ്റെ പന്തൽ സാധനങ്ങൾ മോഷണം പോയ കേസിലാണ് ഇയാളെ അറസ്റ്റ് ചെയ്തത്. ഈ മാസം 15ന് ആയിരുന്നു സംഭവം. ഷാജഹാൻ പന്തൽ പണിക്കായി വീടിനു മുൻപിൽ ഇറക്കിയ ജി ഐ പൈപ്പാണ് മോഷണം പോയത്.
തുടർന്ന് പോലീസ് നടത്തിയ അന്വേഷണത്തിൽ പറക്കോട് അറുകാലിക്കലിൽ സംശയകരമായി കണ്ടെത്തിയ ഓട്ടോ പരിശോധിച്ചപ്പോൾ ജി ഐ പൈപ്പ് കണ്ടെത്തുക ആയിരുന്നു. പോലീസ് നടത്തിയ ചോദ്യം ചെയ്യലിൽ ഓട്ടോ ഡ്രൈവറും നിയാസും പരസ്പര വിരുദ്ധമായ മറുപടി പറയുകയും പിന്നീട് നിയാസ് കുറ്റ സമ്മതം നടത്തുകയും ചെയ്തതായി പോലീസ് പറഞ്ഞു. ഓട്ടോ ഡ്രൈവർക്ക് ഇതിൽ പങ്കില്ലെന്ന് വ്യക്തമായി.
അടൂർ എസ് എച്ച് ഒ ശൃം മുരളി, എസ് ഐ മാരായ എ പി അനീഷ്, ധന്യ, എസ് സി പി ഒ പ്രമോദ്, സി പി ഒ മാരായ വി ഗ്നേഷ്, ആനന്ദ് എന്നിവർ അന്വേഷണത്തിന് നേതൃത്വം നൽകി.
