തിരുവനന്തപുരം : ചില സ്വകാര്യ ആശുപത്രികളില് രാത്രിയില് രോഗികളെ എത്തിച്ചാല് ആംബുലന്സ് ഡ്രൈവര്മാര്ക്ക് പണം നല്കുന്നുണ്ടെന്ന ആരോപണവുമായി ആരോഗ്യമന്ത്രി വീണാ ജോര്ജ് ആരോപിച്ചു. കൊച്ചിയിലെ ചില ആശുപത്രികളില് രോഗികളെ എത്തിച്ചാല് ഡ്രൈവര്മാര്ക്ക് 10,000 രൂപ വരെ നല്കും. തിരുവനന്തപുരത്ത് ഇത്തരത്തില് 5000 രൂപ വരെ സ്വകാര്യ ആശുപത്രികള് നല്കുന്നുണ്ട്. ചിലര്ക്ക് വൗച്ചര് നല്കുന്നുണ്ടന്നും വീണാ ജോര്ജ് പറഞ്ഞു.
കേരള നഴ്സസ് ആന്ഡ് മിഡ്വൈവ്സ് കൗണ്സില് ആസ്ഥാനമന്ദിരത്തിന്റെ ശിലാസ്ഥാപനവും നവീകരിച്ച സോഫ്റ്റ്വേര് ഉദ്ഘാടനവും നിര്വഹിക്കുകയായിരുന്നു മന്ത്രി. സര്ക്കാര് ആശുപത്രികളില് സൗകര്യങ്ങളുണ്ടാകുന്നത് സ്വകാര്യ മേഖലയ്ക്ക് നഷ്ടവും ജനങ്ങള്ക്ക് നേട്ടവുമാണ്. സര്ക്കാര് ആശുപത്രികളെ ആക്രമിക്കുന്നതിന്റെ ലക്ഷ്യമിതാണെന്നും മന്ത്രി പറഞ്ഞു.
അടുത്തിടെ സര്ക്കാര് ആശുപത്രികളെ സംബന്ധിച്ച് 47 പരാതികളാണ് ലഭിച്ചത്. എന്നാല് സ്വകാര്യ ആശുപത്രികളെ സംബന്ധിച്ച് 600ലധികം പരാതികളാണ് ലഭിച്ചത്. അതില് ഒന്നിലും നടപടിയെടുക്കാതെ ഒത്തുതീര്പ്പുണ്ടാക്കുകയാണവര് എന്നും മന്ത്രി വ്യക്തമാക്കി.
