കോട്ടയം : കേരളത്തിലെ പ്രമുഖ സംഗീതോത്സവങ്ങളിലൊന്നായ മള്ളിയൂര്‍ ശ്രീ മഹാഗണപതി ക്ഷേത്രത്തിലെ ഗണേശ സംഗീതോത്സവത്തിന് നവംബര്‍ 17-ന് തുടക്കമാകും. തുടര്‍ന്നുള്ള 67 ദിവസങ്ങളില്‍ ദക്ഷിണേന്ത്യയിലെ പ്രമുഖ സംഗീതജ്ഞരുടെയും കലാകാരന്മാരുടെയും രാഗ-താള വിസ്മയങ്ങള്‍ക്ക് മള്ളിയൂര്‍ വേദിയാകും.
വൃശ്ചികം ഒന്നിന് മള്ളിയൂര്‍ സംഗീതമണ്ഡപത്തില്‍ നടക്കുന്ന ചടങ്ങില്‍ മള്ളിയൂര്‍ പരമേശ്വരന്‍ നമ്പൂതിരി ഭദ്രദീപം തെളിച്ച് സംഗീതോത്സവം ഉദ്ഘാടനം ചെയ്യും. എല്ലാ ദിവസവും വൈകിട്ട് ഏഴിനാണ് സംഗീതപരിപാടികള്‍. ദക്ഷിണേന്ത്യയിലെ പ്രമുഖ സംഗീതജ്ഞരും വാദ്യകലാകാരന്മാരും വിവിധ ദിവസങ്ങളിലായി അരങ്ങിലെത്തും.
രണ്ട് മാസത്തോളം നീളുന്ന വിപുലമായ സംഗീതാര്‍ച്ചന 28-ാം വര്‍ഷത്തിലേക്ക് കടക്കുന്ന സംഗീതോത്സവമാണിതെന്ന് മള്ളിയൂർ ദിവാകരന്‍ നമ്പൂതിരി അറിയിച്ചു.
