തിരുവനന്തപുരം : രാഹുല് മാങ്കൂട്ടത്തില് എംഎല്എയ്ക്കെതിരെ പീഡനക്കേസ് നൽകിയ അതിജീവിതയെ സൈബർ ഇടത്തിൽ അധിക്ഷേപിച്ച കേസിൽ അറസ്റ്റിലായ രാഹുല് ഈശ്വറിന് ജാമ്യമില്ല.അഡീഷനല് ചീഫ് ജുഡീഷ്യല് മജിസ്ട്രേറ്റ് കോടതിയാണ് ഹര്ജി പരിഗണിച്ചത്.ജില്ലാ പ്രിന്സിപ്പല് സെഷന്സ് കോടതിയിലും രാഹുൽ ജാമ്യഹര്ജി നല്കിയിരുന്നുവെങ്കിലും പിന്വലിച്ചിരുന്നു.
രാഹുല് ഈശ്വര് അന്വേഷണവുമായി സഹകരിക്കുന്നില്ലെന്ന പ്രോസിക്യൂഷന് വാദം അംഗീകരിച്ചാണ് കോടതി ജാമ്യം നിഷേധിച്ചത് .സാമൂഹിക മാധ്യമത്തിലെ പോസ്റ്റുകളടക്കം പിന്വലിക്കാമെന്ന് രാഹുല് ഈശ്വര് കോടതിയിൽ പറഞ്ഞിരുന്നു. രാഹുല് മാങ്കൂട്ടത്തില് കേസിന്റെ എഫ്ഐആര് വിഡിയോയില് വായിക്കുക മാത്രമാണ് ചെയ്തതെന്നും അതിജീവിതയെ അപമാനിക്കണമെന്ന ഉദ്ദേശ്യം ഉണ്ടായിരുന്നില്ലെന്നും രാഹുല് ഈശ്വറിന്റെ അഭിഭാഷകൻ വാദിച്ചു .
പരാതിക്കാരിയെ തിരിച്ചറിയാന് സാധിക്കും വിധമുള്ള വിവരങ്ങള് പങ്കുവച്ചതായി ആരോപിച്ച് രാഹുല് ഈശ്വര്, സന്ദീപ് വാരിയര് എന്നിവരടക്കം 6 പേര്ക്കെതിരെയാണ് കേസെടുത്തത്.
