കൊച്ചി: മട്ടാഞ്ചേരിയില്‍നിന്ന് എറണാകുളം സൗത്ത് റെയില്‍വേ സ്റ്റേഷനിലേക്കുള്ള 9 കിലോമീറ്റര്‍ യാത്ര 15 മിനിറ്റിനുള്ളില്‍ പൂര്‍ത്തിയാക്കാന്‍ കഴിയുന്ന സ്‌കൈ മെട്രോ പദ്ധതിയുമായി മെട്രോമാന്‍ ഇ ശ്രീധരന്‍. തൂങ്ങിക്കിടക്കുന്ന പോഡുകള്‍ ഉപയോഗിക്കുന്ന ഗതാഗത സംവിധാനമാണ് അദ്ദേഹം നിര്‍ദ്ദേശിച്ചിരിക്കുന്നത്. കൊച്ചിയില്‍ വര്‍ധിച്ചുവരുന്ന ഗതാഗത ആവശ്യങ്ങളും പരമ്പരാഗത മെട്രോ ശൃംഖല വികസിപ്പിക്കുന്നതിനുള്ള ഉയര്‍ന്ന ചെലവും കണക്കിലെടുത്താണ് പുതിയ നിര്‍ദ്ദേശം.
പരമ്പരാഗത എലിവേറ്റഡ് മെട്രോ ലൈനിന് കിലോമീറ്ററിന് 200 കോടി രൂപയിലധികം ചെലവ് വരുമ്പോള്‍, സ്‌കൈ മെട്രോയ്ക്ക് കിലോമീറ്ററിന് 100 കോടി രൂപയില്‍ താഴെ മാത്രമേ ചെലവ് വരൂ എന്ന് ശ്രീധരന്‍ വിലയിരുത്തുന്നു. ഷാര്‍ജയില്‍ അടുത്തിടെ സ്ഥാപിച്ച സംവിധാനം പഠിച്ച് വിശദമായ പദ്ധതി റിപ്പോര്‍ട്ട് തയ്യാറാക്കാന്‍ അദ്ദേഹം കൊച്ചി മെട്രോ റെയില്‍ ലിമിറ്റഡിനോട് ആവശ്യപ്പെട്ടു.
കൊച്ചിയിലെ ജനസംഖ്യയ്ക്ക് വേഗത്തില്‍ മെട്രോ ശൃംഖല വികസിപ്പിക്കേണ്ടതുണ്ട്. ജിഎസ്ടി അടക്കമുള്ള നികുതികള്‍ കാരണം പരമ്പരാഗത മെട്രോകള്‍ സംസ്ഥാന സര്‍ക്കാരുകള്‍ക്ക് വലിയ സാമ്പത്തിക ബാധ്യതയാകുന്നു. സര്‍ക്കാര്‍ സബ്സിഡികള്‍ കുറയുകയും നിര്‍മാണ സാമഗ്രികളുടെയും ഭൂമിയുടെയും വില കൂടുകയും ചെയ്യുന്നു. യാത്രക്കാരുടെ എണ്ണം ഇല്ലാത്ത റൂട്ടുകളില്‍ ചെലവ് കുറഞ്ഞതും ഭാരം കുറഞ്ഞതുമായ ഗതാഗത സംവിധാനങ്ങള്‍ പരിഗണിക്കണമെന്നും അദ്ദേഹം പറഞ്ഞു.
മട്ടാഞ്ചേരി കൊട്ടാരത്തിന് സമീപമുള്ള മന്ത്ര റോഡ് – സാന്റോ ഗോപാലന്‍ റോഡ് ജംക്ഷനില്‍ നിന്നാണ് നിര്‍ദിഷ്ട പാത ആരംഭിക്കുന്നത്. സാന്റോ ഗോപാലന്‍ റോഡിലൂടെ സഞ്ചരിച്ച് പിടി ജേക്കബ് റോഡിലേക്ക് തിരിഞ്ഞ് ഗേറ്റ്വേ ഓഫ് കൊച്ചിന്‍ പാലം കടക്കും. അവിടെനിന്ന് പഴയ എന്‍എച്ച്-47 വഴി വെണ്ടുരുത്തി പാലം കടന്ന് പേരമാനൂരിലേക്ക് എത്തും.
തുടര്‍ന്ന് കൊച്ചിന്‍ ഷിപ്പ്യാര്‍ഡിനായി ഉണ്ടായിരുന്ന പഴയ റെയില്‍വേ സൈഡിങ് അലൈന്‍മെന്റിലൂടെ റെയില്‍വേ ട്രാക്കിലേക്ക് തിരിഞ്ഞ്, നിലവിലുള്ള റെയില്‍വേ ലൈനിന്റെ പടിഞ്ഞാറുഭാഗത്തുകൂടി എറണാകുളം സൗത്ത് സ്റ്റേഷനിലേക്ക് നീങ്ങും. രണ്ട് ടെര്‍മിനല്‍ സ്റ്റേഷനുകള്‍ ഉള്‍പ്പെടെ 9 കിലോമീറ്റര്‍ പാതയില്‍ 10 സ്റ്റേഷനുകളാണ് ഉണ്ടാവുക. താങ്ങുതൂണുകള്‍ 200 മുതല്‍ 300 മീറ്റര്‍ വരെ ഇടവിട്ട് സ്ഥാപിക്കുമ്പോള്‍, കൃത്യമായി ഒരു കിലോമീറ്റര്‍ ഇടവിട്ടാണ് സ്റ്റേഷനുകള്‍ നിര്‍ദേശിച്ചിരിക്കുന്നതെന്നും അദ്ദേഹം പറഞ്ഞു.
