പത്തനംതിട്ട: മന്ത്രി വീണാ ജോർജിന്റെ ഭർത്താവിന്റെ കെട്ടിടത്തിനു സമീപത്തെ ഓട നിർമാണവുമായി ബന്ധപ്പെട്ട പ്രതിഷേധത്തിനിടെ പത്തനംതിട്ട കൊടുമണ്ണിൽ കോൺഗ്രസ് പ്രവർത്തകരും പൊലീസും തമ്മിൽ തർക്കം. പ്രതിഷേധിച്ച കോൺഗ്രസ് പ്രവർത്തകരെ പൊലീസ് കസ്റ്റഡിയിലെടുത്തു. മുൻപ് പ്രതിഷേധമുണ്ടായ സമയത്ത് ഇവിടെ സ്ഥാപിച്ച കൊടി പൊലീസെടുത്ത് മാറ്റിയെന്നാണ് കോൺഗ്രസ് പ്രവർത്തകർ ആരോപിക്കുന്നത്. തർക്കമേഖല ഒഴിവാക്കി ഈ ഭാഗത്തെ റോഡിന്റെ നിർമാണം മുന്നോട്ടു കൊണ്ടുപോകാൻ കഴിഞ്ഞദിവസം പൊതുമരാമത്ത് മന്ത്രി അനുമതി നൽകിയിരുന്നു.
താൻ മന്ത്രിയാകുന്നതിനു മുൻപ് റോഡ് നിർമാണത്തിനുള്ള ധനാനുമതി നൽകിയതാണ്. കിഫ്ബി നിശ്ചയിച്ച അലൈൻമെന്റിൽ ഒരു മാറ്റവും വരുത്തിയിട്ടില്ല എന്ന് ഉദ്യോഗസ്ഥർ രേഖകൾ സഹിതം കാണിച്ചിട്ടും ചില പ്രാദേശിക കോൺഗ്രസ് നേതാക്കൾ കേൾക്കാൻ തയാറാകുന്നില്ലെന്നും കാട്ടി മന്ത്രി നേരത്തെ വിശദീകരണം നൽകിയിരുന്നു
