ആലപ്പുഴ: പക്ഷിപ്പനി സ്ഥിരീകരിച്ച എടത്വ,തകഴി, അമ്പലപ്പുഴ വടക്ക് പഞ്ചായത്തിൽ കള്ളിംഗ് പ്രവർത്തനങ്ങൾ തുടങ്ങി. കൊല്ലം ജില്ലയിൽ നിന്നുള്ള 5 ദ്രുതകർമ്മ സേന അംഗങ്ങളും ആലപ്പുഴ ജില്ലയിൽ നിന്നുള്ള 13 ദ്രുതകർമ്മ സേന അംഗങ്ങളും കള്ളിംഗ് പരിപാടിയിൽ പങ്കെടുത്തു. രാവിലെ ദ്രുതകർമ്മ സേന അംഗങ്ങൾക്ക് എടത്വ കമ്മ്യൂണിറ്റി ഹാളിൽ മൃഗസംരക്ഷണ വകുപ്പും ആരോഗ്യവകുപ്പ് അധികൃതരും പരിശീലനം നൽകുകയും ചെയ്തു.
എടത്വ പഞ്ചായത്തിൽ 9 ദ്രുതകർമ്മ സേനയും തകഴി പഞ്ചായത്തിൽ 6 ദ്രുതകർമ്മ സേനയും അമ്പലപ്പുഴ വടക്ക് പഞ്ചായത്തിൽ 3 ദ്രുതകർമ്മ സേനയും ഉൾപ്പെടെ 18 ടീം ആയിരുന്നു പ്രവർത്തനങ്ങളിൽ ഏർപ്പെട്ടത്. ഏകദേശം 10 മണിയോടുകൂടി കള്ളിംഗ് പരിപാടികൾ ആരംഭിച്ചു. മൃഗസംരക്ഷണ വകുപ്പ്, ആരോഗ്യവകുപ്പ്, തദ്ദേശഭരണ വകുപ്പ് എന്നിവയുടെ നേതൃത്വത്തിലാണ് കള്ളിങ്ങ് ജോലികൾ തുടരുന്നത്
