കോഴഞ്ചേരി : ഓഗസ്റ്റ് 3 ന് നടക്കുന്ന കർക്കിടക വാവുബലി തർപ്പണത്തിന് ഇക്കുറി വിപുലമായ ക്രമീകരണങ്ങൾ ഒരുക്കുമെന്ന് അയിരൂർ – ചെറുകോൽപ്പുഴ ഹിന്ദുമത മഹാ മണ്ഡലം പ്രവർത്തക യോഗം അറിയിച്ചു. പമ്പാനദിയിൽ ചെറുകോൽപ്പുഴ കടവിൽ ചട്ടമ്പിസ്വാമി സ്മൃതി മണ്ഡപത്തിന് സമീപം വിദ്യാധിരാജ നഗറിലാണ് ബലി തർപ്പണം നടക്കുന്നത്.
തിരക്ക് പരിഗണിച്ച് ഒരേ സമയം 200 ൽ അധികം പേർക്ക് കർമം ചെയ്യുന്നതിനായി ഇവിടെ പന്തലും നിർമിക്കുമെന്ന് ഭാരവാഹികൾ പറഞ്ഞു. മലയാലപ്പുഴ ഐക്കരേത്ത് ഇല്ലത്ത് ദീപു നമ്പൂതിരിയുടെ മുഖ്യ കാർമികത്വത്തിലാണ് ചടങ്ങുകൾ നടക്കുക. മൂന്നിന് പുലർച്ചെ 4.30 മുതൽ തർപ്പണ ചടങ്ങുകൾ ആരംഭിക്കും. അനിരാജ് ഐക്കര ( ചെയർമാൻ), എം.ടി.ഭാസ്കര പണിക്കർ (കൺവീനർ)എന്നിവരുടെ നേതൃത്വത്തിൽ 51 അംഗ കമ്മിറ്റി പ്രവർത്തനം ആരംഭിച്ചു.
ഇത്തവണ 3000 പേർ ബലി തർപ്പണത്തിന് എത്തുമെന്നാണ് സംഘാടകർ പ്രതീക്ഷിക്കുന്നത്. യോഗത്തിൽ ഹിന്ദുമത മഹാ മണ്ഡലം ട്രഷറർ ടി.കെ. സോമനാഥൻ നായർ അധ്യക്ഷത വഹിച്ചു
