തിരുവനന്തപുരം : പാറശാലയിൽ റെയിൽവേ ട്രാക്കിലേക്ക് മണ്ണിടിഞ്ഞുവീണ് ബിലാസ്പൂർ–തിരുനെൽവേലി എക്സ്പ്രസ് ട്രെയിനിന്റെ എൻജിൻ പാളം തെറ്റി. പുലർച്ചെ 3.30ന് ട്രെയിൻ കടന്നുപോകുമ്പോഴായിരുന്നു മണ്ണിടിച്ചിൽ ഉണ്ടായത്. തിരുവനന്തപുരത്തുനിന്ന് തിരുനെൽവേലിയിലേക്ക് പോകുകയായിരുന്ന ട്രെയിനിന്റെ എൻജിനിലെ നാല് ചക്രങ്ങളാണ് പാളം തെറ്റിയത്.
കഴിഞ്ഞ ദിവസം മുതൽ തിരുവനന്തപുരം ജില്ലയിൽ അതിശക്തമായ മഴയാണ്. ഇതേത്തുടർന്നാണ് മണ്ണ് പാളത്തിലേക്ക് ഇടിഞ്ഞു വീണത് .ലോക്കോ പൈലറ്റിന്റെ സമയോചിത ഇടപെടലിലാണ് വലിയ അപകടം ഒഴിവായത്. സംഭവത്തെ തുടർന്ന് നിരവധി ട്രെയിനുകൾ വൈകുന്നുണ്ട്.
