തിരുവനന്തപുരം : 108 ആംബുലൻസിൽ എമർജൻസി മെഡിക്കൽ ടെക്നീഷ്യൻമാരായി അംഗീകൃത നഴ്സുമാരെ മാത്രമേ നിയമിക്കൂവെന്ന് ആരോഗ്യ മന്ത്രി കെ.മുരളീധരൻ അറിയിച്ചു. 108 ആംബുലൻസിന്റെ നടത്തിപ്പ് ചുമതലയുള്ള കരാർ കമ്പനിയായ ഇ.എം.ആർ.ഐ ഗ്രീൻഹെൽത്ത് സർവീസസ് അധികൃതരുമായി മന്ത്രി കെ.മുരളീധരൻ നടത്തിയ ചർച്ചയിലാണ് ഇത് സംബന്ധിച്ച് തീരുമാനമെടുത്തത്.
നേരത്തെ ഒപ്പുവച്ച കരാർ പ്രകാരം നഴ്സിംഗ് പാസാകാത്തവർക്കും എമർജൻസി മെഡിക്കൽ ടെക്നീഷ്യൻമാരായി നിയമിക്കാൻ വ്യവസ്ഥ ചെയ്തിരുന്നു. എന്നാൽ നഴ്സുമാരെ ഒഴിവാക്കുന്നത് അടിയന്തരവൈദ്യസഹായത്തെ പ്രതികൂലമായി ബാധിക്കുമെന്നതിനാൽ നഴ്സുമാരെ മാത്രമേ ഈ തസ്തികയിൽ നിയോഗിക്കാൻ പാടുള്ളൂവെന്ന് മന്ത്രി കെ.മുരളീധരൻ നിലപാടെടുത്തു.
കേരളത്തിന്റെ ആരോഗ്യ സാഹചര്യം വ്യത്യസ്തമാണെന്നും അതീവ ഗുരുതരാവസ്ഥയിലുള്ളവരുടെ ജീവൻ രക്ഷിക്കാൻ കഴിഞ്ഞ കാലങ്ങളിൽ 108ലെ നഴ്സുമാർക്ക് കഴിഞ്ഞിട്ടുണ്ടെന്നും അതിനാൽ നഴ്സുമാരെ മാത്രമേ നിയോഗിക്കാനാകൂവെന്നും മന്ത്രി കെ.മുരളീധരൻ പറഞ്ഞു.
