പത്തനംതിട്ട: ടൗണിലെ പ്രധാന പാതയായ അബാൻ റോഡിൽ പ്രധാന കുടിവെള്ള പൈപ്പ് ലൈൻ തകർന്ന് ദിവസങ്ങൾ പിന്നിട്ടിട്ടും തകരാർ പരിഹരിക്കാൻ നടപടിയെടുക്കാതെ വാട്ടർ അതോറിറ്റി. അബാൻ മേൽപ്പാലത്തിന് തൊട്ടുതാഴെയാണ് ലക്ഷക്കണക്കിന് ലിറ്റർ ശുദ്ധജലം പാഴാക്കി പൈപ്പ് പൊട്ടി ഒഴുകുന്നത്.
സ്വകാര്യ ബസ് സ്റ്റാൻഡിലേക്ക് ബസ്സുകൾ പ്രവേശിക്കുന്നതും പുറത്തേക്ക് പോകുന്നതും ഈ റോഡ് വഴിയാണ്. പൈപ്പ് പൊട്ടി വെള്ളം നിരന്തരം റോഡിലൂടെ ഒഴുകുന്നത് കാരണം റോഡിൽ വലിയ ഗർത്തങ്ങൾ രൂപപ്പെട്ടിട്ടുണ്ട്. വെള്ളക്കെട്ട് കാരണം കുഴികളുടെ ആഴമറിയാതെ ഇരുചക്ര വാഹനയാത്രക്കാരടക്കം അപകടത്തിൽപ്പെടുന്നത് ഇവിടെ പതിവുദൃശ്യമാണ്. ബസ്സുകൾ കടന്നുപോകുമ്പോൾ കാൽനടയാത്രക്കാരുടെ മേൽ ചെളിവെള്ളം തെറിക്കുന്നതും വലിയ പ്രതിഷേധത്തിന് ഇടയാക്കുന്നുണ്ട്.
വേനൽ കടുക്കുന്നതിനിടെ ഒരു വശത്ത് കുടിവെള്ള ക്ഷാമം രൂക്ഷമാകുമ്പോഴാണ് പത്തനംതിട്ട നഗരമധ്യത്തിൽ ദിവസങ്ങളായി കുടിവെള്ളം പാഴായിക്കൊണ്ടിരിക്കുന്നത്. വിഷയം വാട്ടർ അതോറിറ്റിയുടെയും നഗരസഭയുടെയും ശ്രദ്ധയിൽപ്പെടുത്തിയിട്ടും പൈപ്പ് ലൈൻ പുനരുദ്ധരിക്കാൻ ഇതുവരെയും അധികൃതരുടെ ഭാഗത്തുനിന്ന് യാതൊരു ഇടപെടലും ഉണ്ടായിട്ടില്ലെന്ന് പ്രദേശവാസികളും വ്യാപാരികളും ആരോപിക്കുന്നു.
മേൽപ്പാലത്തിന് താഴെയുള്ള ഗതാഗതക്കുരുക്കിന് പുറമെ റോഡ് തകർന്നത് നഗരത്തിലെ ഗതാഗതത്തെയും പ്രതികൂലമായി ബാധിച്ചിട്ടുണ്ട്. അടിയന്തരമായി പൈപ്പ് ലൈനിലെ ചോർച്ച അടച്ച് റോഡിലെ കുഴികൾ അടയ്ക്കാനുള്ള നടപടികൾ സ്വീകരിച്ചില്ലെങ്കിൽ ശക്തമായ ജനകീയ പ്രതിഷേധവുമായി മുന്നോട്ടുപോകാനാണ് പ്രദേശവാസികളുടെ തീരുമാനം
