ചങ്ങനാശ്ശേരി : കലയുടെ ആവേശം പ്രേക്ഷകരിലുണർത്തി സെന്റ് ചാവറ ട്രോഫി – ഇടിമണ്ണിക്കൽ യവനിക സീസൺ 3 നാടകോത്സവം പുരോഗമിക്കുന്നു. ആറാം ദിനമായ ഇന്നലെ തിരുവനന്തപുരം സൗപർണികയുടെ മണികർണിക അരങ്ങേറി. ഇന്ത്യയുടെ ജോൻ ഓഫ് ആർക്ക് എന്ന് ചരിത്രം അടയാളപ്പെടുത്തിയ ത്സാൻസി റാണിയെന്ന മണികർണ്ണികയുടെ ധീരോദാത്തമായ പോരാട്ടം അരങ്ങിൽ മറ്റൊരു ഇതിഹാസമാകുന്ന ആവിഷ്കാരമാണ് കാഴ്ചക്കാർക്കുമുന്നിൽ ഒരുങ്ങിയത്.
കലാ സാഹിത്യ വേദി സെക്രട്ടറി എം.എ. ആൻ്റണി ചടങ്ങിന് സ്വാഗതം ആശംസിച്ചു. കളത്തിൽ കൃഷ്ണ ഭവൻ, അന്തരിച്ച സുദീപിൻ്റെ സ്മരണാർത്ഥം മാതാവ് യമുനാ മാധവൻ പിള്ള ഏർപ്പെടുത്തുന്ന ഗാനദീപം അവാർഡ് ദാനവും നടന്നു. യുവ ഗായക പ്രതിഭ ഫ്ലവേഴ്സ് സ്റ്റാർ സിംഗർ ഫെയിം ബെവൻ ബിജു അവാർഡ് ഏറ്റു വാങ്ങി. പനാമ ജോസ് ചടങ്ങിന് നന്ദി പ്രകാശിപ്പിച്ചു. കലാ സാഹിത്യ വേദി അംഗങ്ങൾ ചടങ്ങിന് നേതൃത്വം നൽകി.
