കൊല്ലം : സ്ത്രീധനം കുറഞ്ഞതിന്റെപേരിൽ നവവധുവിന് ക്രൂരമർദനം. സംഭവത്തിൽ ചവറ പൊലീസ് ഗാർഹിക പീഡനത്തിന് കേസെടുത്തു.കൊല്ലം നീണ്ടകര മണ്ണാന്തറ സ്വദേശി 24കാരിയായ അഞ്ജുവിന്റെ പരാതിയുടെ അടിസ്ഥാനത്തിൽ ചവറ പൊലീസ് പരിമണം സ്വദേശിയായ ഭർത്താവ് നന്ദു, പിതാവ് ദിനേശ്, മാതാവ് ജഗദമ്മ എന്നിവർക്കെതിരെ കേസെടുത്തു.
നാല് മാസം മുൻപാണ് അഞ്ജുവിന്റെ വിവാഹം നടന്നത് . വിവാഹം കഴിഞ്ഞ് ഒരാഴ്ചയ്‌ക്കുള്ളിൽ തന്നെ സ്ത്രീധനത്തിന്റെ പേരിലുള്ള പീഡനം ആരംഭിച്ചെന്നാണ് യുവതിയുടെ മൊഴി.പിന്നീട് സൗദിയിലെത്തിയ ശേഷം ഭർത്താവ് ലാപ്ടോപ്പ് ചാർജർ, ബെൽറ്റ്, കുക്കർ ഉൾപ്പെടെയുള്ള അടുക്കള ഉപകരണങ്ങൾ ഉപയോഗിച്ച് മർദ്ദിച്ചെന്നാണ് പരാതി.ക്രൂരമർദനമേറ്റ യുവതി സെപ്റ്റംബർ 30 ന് തിരിച്ചു നാട്ടിലെത്തി പൊലീസിനു പരാതി നൽകുകയായിരുന്നു.
