പത്തനംതിട്ട: ഇടവമാസ പൂജയ്ക്കായി ശബരിമല അയ്യപ്പ ക്ഷേത്രനട ഇന്നു വൈകിട്ട് 5ന് തുറക്കും. തന്ത്രി കണ്ഠര് മഹേഷ് മോഹനരുടെ സാന്നിധ്യത്തിൽ മേൽശാന്തി ഇ ഡി പ്രസാദ് നട തുറന്ന് ദീപം തെളിയിക്കും. പതിനെട്ടാം പടിക്ക് താഴെ ആഴിയിൽ അഗ്നി പകരും. നാളെ മുതൽ 19 വരെ പൂജകൾ ഉണ്ടാകും. ദിവസവും നെയ്യഭിഷേകം, കളഭാഭിഷേകം, ഉദയാസ്തമനപൂജ, അഷ്ടാഭിഷേകം, പടിപൂജ, പുഷ്പാഭിഷേകം എന്നിവ നടക്കും. നെയ്യഭിഷേകം രാവിലെ 5.30ന് ആരംഭിച്ചു 9.30 വരെ തുടരും. ഉച്ചയ്ക്ക് കളഭാഭിഷേകം ഉണ്ട്.
19ന് സഹസകലശാഭിഷേകത്തോടെയാണു നട അടയ്ക്കുക. ഇതിനുള്ള കലശപൂജ 18നു വൈകിട്ട് 5ന് നട തുറന്ന ശേഷം നടത്തും. 19-ന് രാത്രി 10 -ന് നട അടയ്ക്കും. അന്ന് വൈകിട്ട് 6 വരെ മാത്രമേ തീർത്ഥാടകരെ പമ്പയിൽ നിന്നു സന്നിധാനത്തേക്ക് കടത്തി വിടുകയുള്ളു. ദർശനത്തിനു വരുന്ന തീർത്ഥാടകർ വെർച്വൽ ക്യൂ ബുക്ക് ചെയ്യേണ്ടതാണ്.
