കീവ് : യുക്രൈനിലെ ചോർണോമോർസ്ക് തുറമുഖത്ത് ചരക്കുകപ്പലിൽ 13 ഇന്ത്യൻ നാവികർ കുടുങ്ങിക്കിടക്കുന്നതായി റിപ്പോർട്ട്. എം.വി. അമിർ1 എന്ന കപ്പലിലാണ് ഇന്ത്യക്കാരടക്കം 15 ജീവനക്കാർ കുടുങ്ങിക്കിടക്കുന്നത്. മേഖലയിൽ റഷ്യ-യുക്രൈൻ സംഘർഷം ശക്തമാണ്.
കരിങ്കടൽ തീരത്തെ യുക്രേനിയൻ തുറമുഖമായ ചോർണോമോർസ്കിൽ ഡ്രോൺ, മിസൈൽ ആക്രമണങ്ങൾ തുടരുന്നതിനിടയിലാണ് ഇന്ത്യക്കാർ കുടുങ്ങിക്കിടക്കുന്നത്. ഏതു സമയത്തും ആക്രമണമുണ്ടായേക്കാമെന്ന ഭീതിയിലാണ് കപ്പലിലെ നാവികർ കഴിയുന്നതെന്ന് നാവികരുടെ സംഘടനയായ ഫോർവേഡ് സീമെൻസ് യൂണിയൻ ഓഫ് ഇന്ത്യ(എഫ്എസ്‌യുഐ) അറിയിച്ചു. ഡ്രോൺ, മിസൈൽ ആക്രമണങ്ങൾ കപ്പലിനു സമീപം നടക്കുന്നുണ്ട്. അധികൃതരും കപ്പൽ ഉടമകളും ഇന്ത്യൻ സർക്കാരും അടിയന്തര നടപടി സ്വീകരിക്കണമെന്ന് എഫ്എസ്‌യുഐ ആവശ്യപ്പെട്ടു
