ആലപ്പുഴ : കരുവാറ്റയിൽ കൊച്ചുമകളുടെ കൊട്ടേഷൻ പ്രകാരം കൊല ചെയ്യപ്പെട്ട വയോധികന്റെ കേസിൽ പോലീസ് ഉടൻ റിപ്പോർട്ട് നൽകും. പെൺകുട്ടി ഒഴികെ കേസിലെ മൂന്ന് പ്രതികളെയും മുതിർന്നവരായി പരിഗണിക്കണമെന്ന് പോലീസ് ആവശ്യപ്പെടും. പ്രതികൾ 18 വയസ്സിന് താഴെയുള്ളവരായതിനാൽ ബാലനീതി നിയമപ്രകാരമാണ് നടപടികൾ മുന്നോട്ടു പോവുക.
എന്നാൽ ക്രൂരമായ കുറ്റകൃത്യങ്ങളിൽ ഉൾപ്പെട്ടാൽ മുതിർന്നവരായി കണ്ട് വിചാരണ നടത്താമെന്നുള്ള ചട്ടം ഉപയോഗപ്പെടുത്തിയാണ് പോലീസ് റിപ്പോർട്ട് നൽകാനൊരുങ്ങുന്നത്. ഇന്നലെ ജൂവനൈൽ ജസ്റ്റിസ് ബോർഡിനു മുമ്പിൽ ഹാജരാക്കിയ നാല് പ്രതികളെയും സംരക്ഷണ കേന്ദ്രത്തിലേക്ക് മാറ്റി. മൂന്നുപേരെയും കസ്റ്റഡിയിൽ ലഭിക്കാൻ പോലീസ് അടുത്തദിവസം അപേക്ഷ നൽകും.
