കോഴഞ്ചേരി : വേരുകൾ തേടി ഉറവകൾ തേടി ചരിത്രാന്വേഷണ യാത്ര മറ്റൊരു ചരിത്രമായി. ആറൻമുള പമ്പാ നദീതട പഠന ഗവേഷണ സമിതിയുടെ നേതൃത്വത്തിൽ കണ്ടറിവു തേടിയുള്ള പര്യടനമാണ് ശ്രദ്ധേയമായത്. കഥാപ്രസംഗകലയുടെ പിതാവ് സ്വാമി സത്യദേവൻ്റെ ഭവനത്തിൽ നടന്ന ചടങ്ങിൽ ആറൻമുള എം എൽ എ അഡ്വ.അബിൻ വർക്കി യാത്ര ഫ്ലാഗ് ഓഫ് ചെയ്തു.
സമിതി ചെയർമാൻ ബാബു തോമസ് അധ്യക്ഷനായി. എക്സിക്യൂട്ടീവ് ഡയറക്ടർ ഡോ.രാജീവ് പുലിയൂർ, ട്രഷറാൾ കെ കെ ശ്രീധരൻ, പഞ്ചായത്ത് പ്രസിഡൻ്റ് ബന്നി കുഴിക്കാല, കെ സി രാജഗോപാലൻ എക്സ്എം എൽ എ തുടങ്ങിയവർ പ്രസംഗിച്ചു.
പമ്പാനദിയുടെ ഉത്ഭവസ്ഥാനം മുതൽ പതനം വരെയുള്ള തീരങ്ങളിലെ പ്രാചീന ജനവാസം, നാഗരികത, വൈദേശീക ബന്ധങ്ങൾ, ആത്മീയ പ്രഭവകേന്ദ്രങ്ങൾ, സാഹതീയ സംഭാവനകൾ തുടങ്ങിയ പൗരാണിക സവിശേഷതകൾ കണ്ടെത്താനുള്ള ശ്രമത്തിലെ ആദ്യ സംരംഭമാണ് ആറൻമുളയിൽ നടന്നത്.
അധ്യാപകർ, ചരിത്രകാരന്മാർ, ഗവേഷകർ, ബി എഡ് വിദ്യാർത്ഥികൾ, സാഹിത്യകാരന്മാർ അടക്കം പത്തു ജില്ലകളിൽ നിന്നും തെരഞ്ഞെടുക്കപ്പെട്ട 48 പേരാണ് പഠനസംഘത്തിലുണ്ടായിരുന്നത്. എക്സ് എംഎൽഎ മാരായ കെ സി രാജഗോപാലൻ,മാലേത്ത് സരളാദേവി, മല്ലപ്പുഴശ്ശേരി പഞ്ചായത്ത് മുൻ പ്രസിഡൻ്റ് മിനി ജിജു ജോസഫ് എന്നിവരും പങ്കെടുത്തു.
