ബെംഗളൂരു : ബെംഗളുരുവിൽ പ്രഭാത സവാരിക്ക് ഇറങ്ങിയ ആൾ കാട്ടാനയുടെ കുത്തേറ്റ് മരിച്ചു. മൈസൂരു റോഡിൽ രാജരാജേശ്വരി മെഡിക്കൽ കോളജിൽ നിന്നു രണ്ടു കിലോമീറ്റർ അകലെ ദൊഡ്ഡബെലെയാണ് സംഭവം. പുലർച്ചെ മകൾക്കൊപ്പം റോഡിലൂടെ നടക്കുന്നതിനിടെ 60 കാരനായ നാഗരാജുവിനെയാണ് ആന ആക്രമിച്ചത്.
വാരിയെല്ലിന് ഗുരുതരമായി ക്ഷതമേറ്റ് റോഡിൽ വീണ നാഗരാജുവിനെ ഉടൻ തന്നെ തൊട്ടടുത്ത ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. ഒരു അപാർട്മെന്റിന്റെ മതിലും ആന തകർത്തിട്ടുണ്ട്. ആനയെ പിടിക്കാൻ വനംവകുപ്പ് ശ്രമിക്കുകയാണ് .
