അടൂർ : 16 വയസുള്ള വിദ്യാർഥിനിയെ ശല്യപ്പെടുത്തുകയാണെന്ന പരാതി അന്വേഷിക്കാൻ പൊലീസ് എത്തിയപ്പോൾ പ്രതി ആത്മഹത്യക്ക് ശ്രമിച്ചു. തട്ട മങ്കുഴി ജീവാലയം ഐ എച്ച്ഡിപി കോളനിയിൽ ജോസ് (40) ആണ് കറിക്കത്തി ഉപയോഗിച്ച് കഴുത്തു മുറിച്ച് ആത്മഹത്യയ്ക്ക് ശ്രമിച്ചത്. ഇന്ന് 12 നായിരുന്നു സംഭവം
സമീപവാസിയായ വിദ്യാർഥിനിയെ ജോസ് നിരന്തരം ശല്യം ചെയ്യുകയായിരുന്നുവെന്ന് പൊലീസ് പറഞ്ഞു. പെൺകുട്ടിയോട് ഇയാൾ നിരന്തരം പ്രേമാഭ്യർഥന നടത്തി വരികയും ചെയ്തു. കഴിഞ്ഞ ദിവസം കുട്ടി വസ്ത്രം മാറുന്നത് ഇയാൾ ഒളിഞ്ഞു നോക്കിയെന്ന് കുട്ടി സ്കൂളിലെത്തി അധ്യാപകരോട് പരാതിപ്പെട്ടിരുന്നു.
അധ്യാപകർ ചൈൽഡ് ലൈനിൽ വിവരം അറിയിച്ചതിനേ തുടർന്ന് കൊടുമൺ പൊലീസ് ഇയാളെ അന്വേഷിച്ച് വീട്ടിൽ എത്തി.ഈ സമയം കതകടച്ച് അകത്തിരുന്ന ജോസ് കത്തി ഉപയോഗിച്ച് കഴുത്ത് മുറിക്കുകയായിരുന്നു. പൊലീസ് ഉടൻ തന്നെ കതക് ചവിട്ടിപ്പൊളിച്ച് ഇയാളെ അടൂർ താലൂക്ക് ആശുപത്രിയിൽ എത്തിച്ചു. പ്രതി അപകടനില തരണം ചെയ്തതായി പൊലീസ് അറിയിച്ചു
