ചങ്ങനാശേരി: തിരുവിതാംകൂർ ദേവസ്വം ബോർഡ് പ്രസിഡന്റ് പി എസ് പ്രശാന്ത് പെരുന്ന എൻഎസ്എസ് ആസ്ഥാനത്ത് എത്തി ജനറൽ സെക്രട്ടറി ജി സുകുമാരൻ നായരെ സന്ദർശിച്ചു. ദേവസ്വംബോർഡ് സംഘടിപ്പിക്കുന്ന ആഗോള അയ്യപ്പ സംഗമത്തിന് എൻഎസ്എസ് ജനറൽ സെക്രട്ടറിയെ ക്ഷണിക്കാനാണ് എത്തിയത്.
ദേവസ്വം ബോർഡിന്റെ ക്ഷണം എൻഎസ്എസ് സ്വീകരിച്ചെന്നും പ്രതിനിധിയെ അയയ്ക്കുമെന്നു ജനറൽ സെക്രട്ടറി അറിയിച്ചതായി പി എസ് പ്രശാന്ത് പറഞ്ഞു. ശബരിമലയെ ആഗോള തീർഥാടന കേന്ദ്രമായി മാറ്റുകയെന്നതാണ് അയ്യപ്പസംഗമത്തിലൂടെ ലക്ഷ്യമിടുന്നത്.
സംഗമം സർക്കാരാണോ ദേവസ്വം ബോർഡാണോ നടത്തുന്നതെന്ന ചോദ്യത്തിനു പ്രസക്തിയില്ല. മണ്ഡല മകരവിളക്ക് ഉത്സവം പൂർണമായും നടത്തുന്നത് ദേവസ്വം ബോർഡാണെങ്കിലും സർക്കാരിന്റെ പിന്തുണയോടെയാണു നടത്തുന്നതെന്നും ദേവസ്വം ബോർഡ് പ്രസിഡന്റ് പറഞ്ഞു.
കണിച്ചുകുളങ്ങരയിൽ എസ്എൻഡിപി ജനറൽ സെക്രട്ടറി വെള്ളാപ്പള്ളി നടേശനെ കണ്ടതിന് ശേഷമാണ് പി എസ് പ്രശാന്ത് പെരുന്നയിൽ എത്തിയത്.
