കോഴിക്കോട് : ശക്തമായ മഴ തുടരുന്ന സാഹചര്യത്തില് വിദ്യാലയങ്ങള് തുറക്കുന്നത് ഒരാഴ്ച്ച കൂടി നീട്ടണമെന്ന് കേരള പ്രൈവറ്റ് അണ് എയ്ഡഡ് സ്കൂള്സ് മാനേജ്മെന്റ് അസോസിയേഷന്. സംസ്ഥാനത്താകെ മഴക്കെടുതി രൂക്ഷമായി തുടരുകയാണ്. കുളങ്ങളും നീരുറവകളും നിറഞ്ഞത് കാരണം അപകടകരമായ സാഹചര്യമാണ് നിലവിലുള്ളത്. സ്കൂള് തുറക്കുന്നതിന് മുന്നോടിയായുള്ള അറ്റകുറ്റപ്പണികളും മറ്റു പ്രവൃത്തികളും മഴ കാരണം ഒരാഴ്ചയായി മുടങ്ങി കിടക്കുകയാണ്.
ഈ സാഹചര്യം വിദ്യാഭ്യാസ വകുപ്പ് മുഖവിലയ്ക്ക് എടുക്കണമെന്നും സ്കൂള് തുറക്കുന്നത് നീട്ടി വയ്ക്കണമെന്നും അസോസിയേഷന് ആവശ്യപ്പെട്ടു. ജൂണ് 2 ന് മധ്യവേനല് അവധിക്കുശേഷം സ്കൂള് തുറക്കാനാണ് തീരുമാനിച്ചിരിക്കുന്നത്. കനത്ത മഴ പെയ്യുന്നതിനാല് കഴിഞ്ഞ നാലുദിവസമായി പല ജില്ലകളിലും സ്കൂളുകള്ക്ക് അവധി നല്കിയിരുന്നു.
