കോട്ടയം: സംസ്ഥാനത്ത് വെള്ളി, ശനി ദിവസങ്ങളില്‍ മഴ മുന്നറിയിപ്പില്ല. ജൂണ്‍ ആദ്യ പകുതി പിന്നിട്ടപ്പോള്‍ സംസ്ഥാനത്ത് 17 ശതമാനം മഴ കുറവ് ലഭിച്ചത്. 18-ാം തീയതിവരെയുള്ള കണക്കുകളനുസരിച്ചാണിത്. ആലപ്പുഴ, കണ്ണൂര്‍, ഇടുക്കി, കാസര്‍കോട്, പാലക്കാട്, തൃശൂര്‍, വയനാട് ജില്ലകളില്‍ മഴക്കുറവ് രേഖപ്പെടുത്തി.
കോട്ടയം, എറണാകുളം, കൊല്ലം, കോഴിക്കോട്, മലപ്പുറം, പത്തനംതിട്ട ജില്ലകളില്‍ സാധാരണ രീതിയില്‍ മഴ പെയ്തു. തിരുവനന്തപുരം ജില്ലയില്‍ സാധാരണയിലും വളരെക്കൂടുതല്‍ മഴ ലഭിച്ചു. 212.4 മില്ലി മീറ്റര്‍ ലഭിക്കേണ്ട സ്ഥാനത്ത് 269.9 മില്ലി മീറ്ററാണ് കിട്ടിയത്. 27 ശതമാനമാണ് കൂടുതല്‍. ഏറ്റവും കുറവ് മഴ ലഭിച്ചത് വയനാട് ജില്ലയിലാണ്. 50 ശതമാനമാണ് മഴക്കുറവ്.
അണക്കെട്ടുകള്‍ കൂടുതലുള്ള ഇടുക്കി ജില്ലയില്‍ 42 ശതമാനം കുറവു മഴയേ ലഭിച്ചുള്ളൂ. 397.5 മില്ലി മീറ്റര്‍ ലഭിക്കേണ്ടസ്ഥാനത്ത് 230.5 മില്ലി മീറ്ററാണ് കിട്ടിയത്.
