ചങ്ങനാശ്ശേരി : വൈശാഖമാസാചരണത്തിനൊരുങ്ങി പഞ്ചപാണ്ഡവ മഹാക്ഷേത്രങ്ങൾ. തിരുവിതാംകൂർ ദേവസ്വം ബോർഡിന്റെ കീഴിലുള്ള പഞ്ചപാണ്ഡവ ക്ഷേത്രങ്ങളിൽ ഏപ്രിൽ 28മുതൽ മെയ്‌ 26വരെ യാണ് വൈശാഖ മാസാചരണം നടക്കുന്നത്. തൃച്ചിറ്റാറ്റ് (ധർമ്മപുത്രർ ),തൃപ്പുലിയൂർ (ഭീമൻ), തിരുവാറൻമുള (അർജുനൻ), തിരുവൻവണ്ടൂർ (നകുലൻ), തൃക്കൊടിത്താനം (സഹദേവൻ) എന്നിങ്ങനെയാണ് പഞ്ച പാണ്ഡവ ക്ഷേത്രങ്ങൾ.
മദ്ധ്യ തിരുവിതാം കൂറിലെ പ്രധാനപ്പെട്ട അഞ്ചു വൈഷ്ണവ ക്ഷേത്രങ്ങളാണ് ഇവ. കോട്ടയം, ആലപ്പുഴ, പത്തനംതിട്ട ജില്ലകളിലായി സ്ഥിതി ചെയ്യുന്ന ഈ ക്ഷേത്രങ്ങളിൽ കേരളത്തിനകത്തു നിന്നും പുറത്തു നിന്നും ധാരാളം വൈഷ്ണവ ഭക്തർ ദർശനം നടത്തുന്നു. ഒരു ദിവസം തന്നെ അഞ്ചു ക്ഷേത്രങ്ങളിലും ദർശനം നടത്തുന്നത് പുണ്യമായി കരുതുന്നു.
വൈശാഖ മസാചരണത്തിനു വേണ്ടിയുള്ള എല്ലാ ഒരുക്കങ്ങളും പഞ്ചദിവ്യദേശ ദർശനും ക്ഷേത്രോപദേശക സമിതികളും ചേർന്ന് തയ്യാറാക്കി.തിരുവൻ വണ്ടൂർ മഹാക്ഷേത്രത്തിൽ നിന്ന് ഏപ്രിൽ 28ന് രാവിലെ 6ന് തിരുവിതാംകൂർ ദേവസ്വം ബോർഡ്‌, പഞ്ച ദിവ്യദേശ ദർശൻ, അഞ്ചമ്പല ക്ഷേത്ര ഉപദേശക സമിതികൾ, ഭക്തജനങ്ങൾ, മാതൃ സമിതികൾ, നാരായണീയ സമിതികൾ എന്നിവയുടെ നേതൃത്വത്തിൽ രഥ ഘോഷയാത്ര ആരംഭിക്കും.
വൈശാഖ മസാചരണ ത്തിന്റെ ഭാഗമായി കെ എസ് ആർ റ്റി സി ബജറ്റ് ടൂറിസം പാക്കേജ് സംസ്ഥാനത്തെ എല്ലാ ഡിപ്പോകളിൽ നിന്നും ഏർപ്പെടുത്തുന്നുണ്ട് .
