തിരുവനന്തപുരം: പി എസ് സി ചെയര്‍മാന്‍ എം ആര്‍ ബൈജു അന്വേഷണവുമായി സഹകരിക്കുന്നില്ലെന്ന് പ്രത്യേക സംഘം കോടതിയെ അറിയിച്ചു. ആസൂത്രണ ബോര്‍ഡ് പരീക്ഷ ക്രമക്കേട് കേസിലാണിത്. തിരുവനന്തപുരം വിജിലന്‍സ് കോടതിയിലാണ് റിപ്പോര്‍ട്ട് നല്‍കിയത്. ഹൈക്കോടതി സിംഗിള്‍ ബഞ്ചിനെയും ഇക്കാര്യം അറിയിക്കും.രണ്ട് തവണ നോട്ടീസ് നല്‍കിയിട്ടും എം ആര്‍ ബൈജു ഹാജരായില്ല.
ഹൈക്കോടതിയിലെ കേസിലെ വിധിവന്ന ശേഷം തീരുമാനമെടുക്കാമെന്നാണ് ബൈജു മറുപടി നല്‍കിയത്. എത്രയും വേഗം അന്വേഷണം പൂര്‍ത്തിയാക്കണമെന്നാണ് ഹൈക്കോടതി നിര്‍ദ്ദേശമെന്ന് പ്രത്യേക അന്വേഷണ സംഘം ചൂണ്ടിക്കാട്ടുന്നു. അതിനായി ബൈജുവിന്റെ മൊഴി രേഖപ്പെടുത്തേണ്ടതുണ്ട്.
ആസൂത്രണ ബോര്‍ഡ് പരീക്ഷ ഉള്‍പ്പെടെ വിവിധ പരീക്ഷകളിലും അഭിമുഖങ്ങളിലും ക്രമക്കേട് കാട്ടി സി പിഎം കാരെ നിയമിച്ചിട്ടുണ്ടെന്നാണ് അന്വേഷണത്തില്‍ കണ്ടെത്തിയിട്ടുളളത്. പി എസ് സി അംഗങ്ങള്‍ക്കുളള പ്രത്യേക പരിരക്ഷ മറയാക്കിയാണ് റാങ്കു പട്ടിക അട്ടിമറിച്ചത്. മുൻ സര്‍ക്കാരിന്റെ കാലത്ത് നിയമിക്കപ്പെട്ടവരാണ് പി എസ് സിയിലുളളത്.
