തിരുവനന്തപുരം: സ്ത്രീകൾക്കായി കെ.എസ്.ആർ.ടി.സി പുതുതായി ആരംഭിച്ച പിങ്ക് ബസ് സർവീസിൽ രാവിലെ 4.30-ന് തിരുവനന്തപുരം റെയിൽവേ സ്റ്റേഷനിൽ നിന്ന് മെഡിക്കൽ കോളേജിലേക്കുള്ള സർവീസിൽ പ്രത്യേക യാത്രാ ക്രമീകരണം ഏർപ്പെടുത്തി.
ഈ സർവീസിൽ മെഡിക്കൽ കോളേജിലേക്ക് ചികിത്സയ്ക്കായി പോകുന്ന സ്ത്രീ രോഗികൾക്കൊപ്പമുള്ള പുരുഷ കൂട്ടിരിപ്പുകാർക്കും, സ്ത്രീ കുട്ടിരിപ്പുകാർക്കൊപ്പമുള്ള പുരുഷ രോഗികൾക്കും യാത്ര ചെയ്യാൻ അനുമതിയുണ്ടാകും. രോഗികൾക്കും അവരുടെ കൂട്ടിരിപ്പുകാർക്കും പുലർച്ചെയുണ്ടാകുന്ന യാത്രാ ബുദ്ധിമുട്ട് പരിഗണിച്ചാണ് ഈ പ്രത്യേക ഇളവ് അനുവദിച്ചിരിക്കുന്നത്.
എന്നാൽ, ഈ പ്രത്യേക അനുമതി രാവിലെ 4.30-ന് തിരുവനന്തപുരം റെയിൽവേ സ്റ്റേഷനിൽ നിന്ന് മെഡിക്കൽ കോളേജിലേക്കുള്ള സർവീസിൽ മാത്രമാണ് ബാധകമാകുക. പിങ്ക് ബസിന്റെ മറ്റ് എല്ലാ ട്രിപ്പുകളിലും നിലവിലുള്ള സ്ത്രീകൾക്കായുള്ള യാത്രാ നിബന്ധനകൾക്ക് യാതൊരു മാറ്റവുമില്ല. എല്ലാ യാത്രക്കാരും ഈ ക്രമീകരണം മനസ്സിലാക്കി സഹകരിക്കണമെന്ന് കെ.എസ്.ആർ.ടി.സി അറിയിച്ചു.
