തിരുവല്ല : ശ്രീഗോവിന്ദൻകുളങ്ങര ദേവീക്ഷേത്രത്തിൽ അഷ്ടദ്രവ്യ മഹാഗണപതി ഹോമത്തോടെ ആരംഭിച്ച്‌ ഒക്ടോബർ 11 മുതൽ 21 വരെ നടന്നുവന്ന എഴുപതാമത് ശ്രീമത് ദേവിഭാഗവത നവാഹയജ്ഞം സമാപിച്ചു. ചണ്ഡികാഹോമത്തോടനുബന്ധിച്ച് അത്യപൂർവമായി നടന്നുവരുന്ന കുമാരി പൂജയിൽ രണ്ടു വയസ്സ് മുതൽ 10 വയസ്സ് വരെയുള്ള ബാലികമാരെ ഭഗവതിയുടെ പ്രത്യക്ഷ രൂപമായി വിധിപ്രകാരം പൂജിക്കുന്ന ചടങ്ങാണ് കുമാരി പൂജ.
യജ്ഞമണ്ഡപത്തിൽ തയ്യാറാക്കിയിരുന്ന പുസ്തക പൂജ മണ്ഡപത്തിൽ നൂറുകണക്കിന് വിദ്യാർത്ഥികളുടെ പുസ്തകം രാവിലെ 7. 30നും 8. 20നും മദ്ധ്യേയുള്ള ശുഭമുഹൂർത്തത്തിൽ, ഗുരു, ഗണപതി, വേദവ്യാസൻ, ദക്ഷിണാ മൂർത്തി, സരസ്വതി ദേവി എന്നിവരെ പൂജിച്ച് പുസ്തക പൂജയോടുകൂടി ക്ഷേത്രം മേശാന്തി ടി ജി ശങ്കരൻ നമ്പൂതിരി പൂജയെടുപ്പ് നടത്തി. ബ്രഹ്മീകൃതം നെയ് പൂജിച്ച് ഭക്തജനങ്ങൾക്ക് വിതരണം ചെയ്തു. തുടർന്ന് വിദ്യാരംഭം കുറിക്കുവാൻ 100 കണക്കിന് വിദ്യാർഥികൾ ക്ഷേത്രത്തിന്റെ തിരുനടയിൽ എത്തിച്ചേർന്നു.
രാവിലെ ചെട്ടികുളങ്ങര ഉമാമഹേശ്വരം തിരുവാതിര സംഘം അവതരിപ്പിച്ച പിന്നൽ തിരുവാതിരയും കൈകൊട്ടിക്കളിയുംനടന്നു. 11 ദിവസം നീണ്ടുനിന്ന നാരായണീയ പാരായണത്തിന്റെ സമർപ്പണം ശ്രീഗോവിന്ദൻകുളങ്ങര നാരായണീയ സമിതി നടത്തി. അന്നപൂർണ ശ്രീകുമാർ &പാർട്ടി അവതരിപ്പിച്ച സെമി ക്ലാസ്സിക്കൽ ഡാൻസ്, ശ്രുതിലയ വെൺപാല അവതരിപ്പിച്ച ഭക്തിഗാനമേള എന്നിവയ്ക്ക് ശേഷം അത്താഴക്കഞ്ഞിയോടെ ഈ വർഷത്തെ തിരുവുത്സവം സമാപിച്ചു.
ക്ഷേത്രത്തിൽ നടന്ന സമർപ്പണച്ചടങ്ങിൽ ക്ഷേത്രം പ്രസിഡന്റ് ശ്രീകുമാർ ആർ പി ശ്രീപദ്മം, സെക്രട്ടറി ശ്രീകുമാർ കൊങ്ങരേട്ട് ,ജിതീഷ് സൗപർണിക, ഗണേഷ് എസ് പിള്ള രാഗവില്ല, ജയകുമാർ കുന്നുവിലാസം, ഉണ്ണി പിഷാരത്ത് എന്നിവർ പ്രസംഗിച്ചു.
