ആലപ്പുഴ : രാജ്യത്തെ ഏറ്റവും വൃത്തിയുള്ള തീരദേശ നഗരങ്ങളുടെ പട്ടികയിൽ ആലപ്പുഴയ്ക്ക് രണ്ടാം സ്ഥാനം. കേന്ദ്ര ഭവന-നഗരകാര്യ മന്ത്രാലയം പ്രഖ്യാപിച്ച സ്വച്ഛ് സർവേക്ഷൻ 2025-26 പുരസ്കാരങ്ങളിലാണ് ആലപ്പുഴ ദേശീയതലത്തിൽ ഈ നേട്ടം സ്വന്തമാക്കിയത്. ഒഡിഷയിലെ പുരി ഒന്നാം സ്ഥാനം നേടിയപ്പോൾ, മഹാരാഷ്ട്രയിലെ രത്നഗിരിയാണ് മൂന്നാം സ്ഥാനത്തെത്തിയത്.
വിനോദസഞ്ചാരത്തിനും കായൽ-കടൽ തീരങ്ങൾക്കും പേരുകേട്ട ആലപ്പുഴയ്ക്ക് ലഭിച്ച ഈ അംഗീകാരം ജില്ലയ്ക്ക് വലിയ അഭിമാനമായി മാറിയിരിക്കുകയാണ്.
സ്വച്ഛ് സർവേക്ഷന്റെ പത്താം പതിപ്പിൽ ആദ്യമായാണ് തീരദേശ നഗരങ്ങൾക്കായി പ്രത്യേക വിഭാഗം ഏർപ്പെടുത്തിയത്. 50,000 മുതൽ മൂന്ന് ലക്ഷം വരെ ജനസംഖ്യയുള്ള നഗരങ്ങളെയാണ് ഈ വിഭാഗത്തിൽ പരിഗണിച്ചത്.
തീരദേശ ശുചിത്വം, മാലിന്യസംസ്കരണം, പൊതുസ്ഥലങ്ങളുടെ പരിപാലനം, ശുചിത്വ സൗകര്യങ്ങൾ എന്നിവ വിലയിരുത്തിയാണ് പുരസ്കാരം നിർണയിച്ചത്. ഉറവിടത്തിലെ മാലിന്യ ശേഖരണം, ശാസ്ത്രീയ സംസ്കരണം, പൊതുജന പങ്കാളിത്തം ഉൾപ്പെടെ 43 മാനദണ്ഡങ്ങളുടെ അടിസ്ഥാനത്തിലായിരുന്നു പരിശോധന.
