തിരുവനന്തപുരം : ഓപ്പറേഷന് ഷോര്ട്ട് സര്ക്യൂട്ട് എന്ന പേരില് കെഎസ്ഇബിയിൽ വിജിലൻസ് നടത്തിയ മിന്നൽ റെയ്ഡിൽ ലക്ഷങ്ങളുടെ അഴിമതിയും വ്യാപകക്രമക്കേടും കണ്ടെത്തി. സംസ്ഥാനത്തെ തിരഞ്ഞെടുക്കപ്പെട്ട 70 ഇലക്ട്രിക്കൽ സെക്ഷൻ ഓഫീസുകളിലാണ് കഴിഞ്ഞ ദിവസം ഒരേസമയം പരിശോധന നടന്നത്. പരിശോധനയിൽ 41 കെഎസ്ഇബി ഉദ്യോഗസ്ഥർ കരാറുകാരിൽ നിന്നായി വാങ്ങിയതും കണക്കിൽപ്പെടാത്തതുമായ 16.50 ലക്ഷം രൂപ കണ്ടെടുത്തു.
കരാറുകാരില്നിന്നും കമ്മിഷന് ഇനത്തില് ഉദ്യോഗസ്ഥര് കൈക്കൂലി വാങ്ങി പരിശോധന നടത്താതെ ബില് മാറി കൊടുക്കുന്നുവെന്ന പരാതിയുടെ അടിസ്ഥാനത്തിലായിരുന്നു റെയ്ഡ് .സംസ്ഥാനത്തെ വിവിധ ഓഫിസുകളില് ലക്ഷങ്ങളുടെ കൈക്കൂലി ഇടപാടുകളാണ് നടന്നിരിക്കുന്നതെന്നാണ് വിജിലന്സ് കണ്ടെത്തൽ.ക്രമക്കേടുകളിൽ ഉൾപ്പെട്ട ഉദ്യോഗസ്ഥരുടെയും കരാറുകാരുടെയും ബാങ്ക് അക്കൗണ്ട് സ്റ്റേറ്റ്മെന്റുകൾ ശേഖരിച്ച് വിശദമായ പരിശോധന നടത്തുമെന്ന് വിജിലൻസ് അറിയിച്ചു.
