തിരുവല്ല : പുഷ്പഗിരി – തുകലശ്ശേരി റോഡിലെ കോട്ടത്തോട് പാലത്തിന് സമീപം പൈപ്പ് പൊട്ടി കുടിവെളളം പാഴാകുന്നു. കഴിഞ്ഞ വെള്ളിയാഴ്ച്ച രാത്രി മുതലാണ് പൈപ്പ് പൊട്ടിയൊഴുകാൻ തുടങ്ങിയതെന്ന് പ്രദേശവാസികൾ പറഞ്ഞു. തിങ്കളാഴ്ച വാട്ടർ അതോറിറ്റി അധികൃതർ എത്തി പരിശോധന നടത്തി പോയെങ്കിലും നടപടി ഒന്നും ഉണ്ടായില്ല. പൈപ്പ് പൊട്ടിയൊഴുകിയതോടെ റോഡിൽ കുഴി രൂപപ്പെട്ടു. ഇതിലൂടെ റോഡിൽ മുഴുവൻ കുടിവെളളം വ്യാപിക്കുന്നു. ഇതിലെ കടന്നു പോകുന്ന കാൽനടക്കാരിലും ഇരുചക്ര വാഹന യാത്രക്കാരിലും വെളളം തെറിച്ച് വീഴുന്നതായി പരാതിയുണ്ട്.
അതേ സമയം പൈപ്പ് പൊട്ടിയതോടെ രാത്രിയിലും പകലും ഇടവിട്ട സമയങ്ങളിൽ ലൈൻ പൂട്ടുന്നുണ്ട്. ഇതോടെ പ്രദേശത്ത് കുടിവെളള ക്ഷാമം നേരിടുകയാണ് . കുടിവെള്ളം കിട്ടാതെ വരുന്നതോടെ ഹോട്ടലും മറ്റ് സ്ഥാപനങ്ങളും വാട്ടർ അതോറിറ്റിയിൽ അറിയിക്കുന്നത് അനുസരിച്ച് വെള്ളം തുറന്നു കൊടുക്കുന്നതായും നാട്ടുകാർ പറഞ്ഞു.
