കൊല്ലം : പരവൂരിൽ പ്രായപൂർത്തിയാകാത്ത പെൺകുട്ടിയെ പീഡിപ്പിക്കാൻ ശ്രമിച്ച കേസിൽ 64 കാരൻ അറസ്റ്റിൽ. പൂതക്കുളം മുക്കട സ്വദേശി പ്രസന്നനാണ് പിടിയിലായത്. ഇയാൾ ഓട്ടോഡ്രൈവറാണ്. കഴിഞ്ഞ ദിവസം സ്കൂളിൽ നിന്നെത്തിയ പെൺകുട്ടി മാതാപിതാക്കൾ തമ്മിലുള്ള വഴക്കുകണ്ട് വീട്ടിൽ നിന്നും ഇറങ്ങിപ്പോകുകയായിരുന്നു .തുടർന്ന് രക്ഷിതാക്കൾ സുഹൃത്തായ പ്രസന്നനെ ഫോണിൽ വിളിച്ച് മകളെ ഓട്ടോയുമായി പോയി അന്വേഷിക്കാൻ ആവശ്യപ്പെട്ടു.
പെൺകുട്ടിയെ 3 കിലോമീറ്റർ അപ്പുറമുള്ള ബസ് സ്റ്റോപ്പിൽ വെച്ച് കണ്ടെത്തിയ പ്രസന്നൻ കുട്ടിയെ തന്‍റെ വീട്ടിലെത്തിക്കുകയുംഅവിടെ വച്ച് കടന്നു പിടിക്കുകയും ചെയ്തെന്നാണ് പരാതി.ഭയന്നോടിയ കുട്ടി വീട്ടിൽ എത്തി അമ്മയോട് വിവരം പറയുകയായിരുന്നു. വിവരമറിഞ്ഞ കുട്ടിയുടെ മാതാപിതാക്കൾ പരവൂർ പൊലീസിൽ പരാതി നൽകി. തുടർന്ന് പൂതക്കുളത്തെ വീട്ടിൽ നിന്ന് പോലീസ് പ്രസന്നനെ പിടികൂടി.വൈദ്യ പരിശോധനയ്ക്ക് ശേഷം കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
