പത്തനംതിട്ട: കോന്നി മെഡിക്കൽ കോളേജ് ആശുപത്രി പരിസരങ്ങളിൽ മോഷണം പതിവാകുന്നതായി പരാതി. ഇന്ന് രാവിലെ ആശുപത്രി അത്യാഹിത വിഭാഗത്തിന് സമീപത്ത് ഓട്ടോറിക്ഷയിൽ നിന്ന് പണവും രേഖകളും അപഹരിച്ചതായാണ് പരാതി ഉയർന്നത്.
കുമ്മണ്ണൂർ ഇസഹാക്ക് മൻസിലിൽ സെയ്ദ് ഇസഹാക്കിൻ്റെ ഓട്ടോയിൽ നിന്ന് 5650 രൂപയും കുടുംബാംഗങ്ങളുടെ ആധാർ കാർഡ്, റേഷൻ കാർഡ്, പെൻഷൻ ബുക്ക്, പാൻ കാർഡ്, ഗ്യാസ് ബുക്ക് എന്നിവയുമാണ് മോഷണം പോയത്.
മോഷണം നടന്ന വിവരം മെഡിക്കൽ കോളേജിലെ സെക്യൂരിറ്റി ജീവനക്കാരുടെ ശ്രദ്ധയിൽപെടുത്തിയെങ്കിലും അവർ തട്ടിക്കയറിയതായി സെയ്ദ് പരാതിപ്പെട്ടു. മോഷണം സംബന്ധിച്ച് കോന്നി പൊലീസിൽ പരാതി നൽകിയതായി സെയ്ദ് പറഞ്ഞു.
ആശുപത്രി പരിസരത്തെ സിസി ടിവികൾ പ്രവർത്തിക്കുന്നില്ലെന്നും ആക്ഷേപമുണ്ട്. കഴിഞ്ഞ 3 മാസത്തിനിടെ അഞ്ചിൽ പരം മോഷണങ്ങൾ മെഡിക്കൽ കോളേജ് ആശുപത്രിയിൽ നടന്നതായാണ് വിവരം.
